मूल घर स्याङ्जा भएका सुभानसिंह थापाले नेपाल एकीकरणका बखत बलभद्र कुँवरको नेतृत्वमा पश्चिमको काँगडा किल्लामा अंग्रेज फौजसँग लडेका थिए। सन् १८१६ को सुगौली सन्धि अघि उनले शहादत पाए।
बेलायती साम्राज्यवाद विरुद्ध नेपालका लागि लडेका सुभानसिंहका छोरा र नाति भने पहिलो र दोस्रो विश्वयुद्धमा बेलायतका तर्फबाट लडे। सुभानसिंहका उनै नाति पूर्व गोर्खा सैनिक नारायणसिंह थापा (९३) भैरहवामा बस्छन्।
थापाको सक्रिय जीवन र स्मरणशक्ति उनको उमेरको तुलनामा धेरै कान्छो लाग्छ। उनीसँग युद्धका रोचक सम्झना मात्र छैनन्, लडाइँ लडेको भूमिमा भोग्नुपरेको हेपाइसम्मका अनुभूति अटेसमटेस छन्।
