मिथिलेश यादव
गत वैशाख ३० गत्ते लहान नगरपालिका– १७ गोविन्दपुर गाउँका ३७ वर्षीय मोहम्मद सफिदको हत्या भयो । शरीर र टाउ छुट्टाछुट्टै अवस्थामा प्रहरीले अर्को दिन शव फेला पा-यो । घटना भएको चार महिना पूरा हुँदा पनि हत्यामा संलग्न अझै पत्ता लागेका छैनन् । स्थानीय मोहम्मद इसाकका चार छोरामध्ये सफिद कान्छा थिए । घरनजिकै रहेको बारीमा सफिदको टाउको नभएको शव भेटिएको थियो । छातीदेखि पेटससम्म गहिरो चोट थियो ।
कर्तव्य ज्यानको कसुरमा मुद्दा दर्ता भए पनि घटनाको चार महिनासम्म पनि घटनाको विषयमा प्रहरी अझै बेखबर छ । यस्तै गत जेठ २३ गत्ते लहान नगरपालिका–१९ का नुरजहा खातुनको हत्या भयो । समान्य विवादमा गाउँमा झगडा भएपछि अर्को पक्षको कुटाइबाट घाइते भएका उनको उपचारको क्रममा मृत्यु भयो । प्रहरी कर्तव्य ज्यान कसुरमा मुद्दा दर्ता गरेर चार जना प्रतिवादी ठहर गरेको छ । तर अहिलेसम्म चारै जना प्रतिवादीलाई प्रहरीले पक्राउ गर्न सकेको छैन ।
यस्तै गत्त साउन ३१ गते गरुडा नगरपालिका– ८, जिंगडियामा २२ वर्षीय निरन्जन रामको घाँटी रेटेर हत्या गरिएको थियो । भदौ ३ गते रौतहटको माधवनारायण नगरपालिका–२, खेसरहियास्थित हनुमान मन्दिरका पूजारी श्रीराम साहको गोली हानी हत्या भयो । मन्दिरमा पूजा सकेर खाना खान बसेका साहको हत्या भएको थियो ।
