चिकित्सा शिक्षा क्षेत्र सुधारका लागि निरन्तर अभियानरत अभियन्ता प्रा. डा. गोविन्द केसीको जीवन रक्षाको माग गर्दै लागि ३३ जना नागरिक अगुवाले सरकारसँग अपिल गरेका छन् ।
विगत १४ दिनदेखि अनसनरत डा. केसीको स्वास्थ्य अवस्था कमजोर बन्दै गएपछि उनीहरुले आइतबार एक विज्ञप्ति जारी गर्दै सकारसँग जीवन रक्षाका लागि अपिल गरेका छन् ।
भदौ २९ मा जुम्लाबाट १९ औं अनशन सुरु गरेका डा. केसी ९ औं दिनमा काठमाडौं ल्याइएका थिए ।
“परीक्षणमा संलग्न चिकित्सकहरुका अनुसार उहाँको शरीर कमजोर भएको छ र कुनै पनि दिन परिस्थिति गम्भीर बन्न सक्नेतर्फ हामी सरकारको ध्यानाकर्षण गराउँदछौं । नेपालको चिकित्सा शिक्षा क्षेत्रमा आम जनताको पहुँच हुनु पर्दछ । सर्वसुलभ स्वास्थ्य व्यवस्था मिलाउनु राज्यको कर्तव्य हो भन्दै उहाँ यसअघि १८ पटक अनशन बसिसक्नु भएको छ, ” उनीहरुले जारी गरेको विज्ञप्तिमा भनिएको छ, “सरकारले पनि उहाँको अनसनन तोडाउने क्रममा अनेकन पटक सम्झौताहरु गरेको छ । विभिन्न सरकारका समयमा पटक-पटक गरिएका ती सम्झौताको पूर्ण कार्यान्वयन नगरिँदा फेरि अनसन जस्तो कठोर बाटो अपनाउन बाध्य भएको डा. केसीले बताउँदै आउनु भएको छ ।”
संविधानले नै निर्दिष्ट गरेका स्वास्थ्य, शिक्षा जस्तो नागरिकका आधारभूत मानव अधिकारको विषय लागु गर्न एक जना वरिष्ठ चिकित्सक बारम्बार आमरण अनसनमा बस्नुपर्ने अवस्था हुनु दुःखद भएको उनीहरुले जनाएका छन् ।
संविधानले व्यवस्था गरेको मौलिक हकप्रति संवेदनशील हुन, डा. केसीसँग सरकारहरुले विगतमा पटकपटक गरेका सम्झौंता कार्यान्वयन गर्न र उनको जीवन रक्षाका लागि सरकारसँग अपिल गरेका छन् ।
यसरी अपिल गर्नेहरुमा पूर्व प्रधानन्यायाधीशद्वय कल्याण श्रेष्ठ र सुशिला कार्की, पूर्व सभामुख दमननाथ ढुंगाना, त्रिविका पूर्व उपकुलपति प्रा.डा. केदारभक्त माथेमालगायत ३३ जना रहेका छन् ।
.JPG)
