अनशनरत डा. गोविन्द केसीको छातीमा समस्या देखिएपछि सिटी स्क्यान गरिने भएको छ । उनलाई त्रिवि अस्पतालमा रहेका डा. केसीलाई त्यहीँको सिटी स्क्यान रूममा लगिएको छ । 

चिकित्सा शिक्षामा सुधारलगायतका ६ बँदे माग राखेर २६ दिनदेखि अनशनरत डा. केसीलाई निमोनियाको लक्षण देखिएको उनका सहयोगी तोसिमा कार्कीले बताइन् । मेडिकल टिमले जाँच गर्दा निमोनियाको लक्षण देखिएको छातीको सिटी स्क्यान गर्न लागिएको हो ।

१९औँ पटक अनशन बसेको २६ दिन बितिसक्दा पनि सरकार र डा. केसीबीच सहमति हुन सकेको छैन । बिहीबार डा. केसी र सरकारी टोलीबीच भएको वार्तामा ड्राफ्ट तयार पारिएको भए तापनि सरकारी निकायले छलफल गरिरहेकाले वार्तामा ढिलाइ भएको छ ।

डा. केसीका प्रतिनिधि सरकारी टोलीको प्रतीक्षामा छन् । सरकारी वार्ता टोलीको नेतृत्व शिक्षासचिव गोपिनाथ मैनालीले र डा. केसीकोतर्फबाट डा. जीवन क्षेत्रीले गरेका छन् ।