इंग्लिस प्रिमियर लिग अन्तर्गत आइतबार राति भएको खेलमा टोटेनहम बराबरीमा रोकिएको छ।
घरेलु मैदानमा भएको खेलमा टोटेनहमले वेस्टह्याम युनाईटेडसँग ३-३ गोलको बराबरीमा रोकिएको हो।
टोटेनहमले पहिलो हाफमा लिएको ३-० को अग्रता जोगाउन नसक्दा बराबरीमा चित्त बुझायो।
टोटेनहमका लागि ह्यारी केनले दुई तथा सन ह्युङ मिनले एक गोल गरे।
वेस्टह्यामका फाबियन बालबेउना र मानुएल लानजिनीले एक एक गोल गरे भने एक गोल आत्मघाती उपहार पाएको थियो।
खेलको पहिलो मिनेटमै सनले गोल गर्दै टोटेनहमलाई अग्रता दिलाएका थिए।
केनले आठौं मिनेटमा गोल गर्दै टोटेनहमलाई २-० को अग्रता दिलाए।
खेलको १६ औं मिनेटमा केनले व्यक्तिगत दोस्रो गोल गरेपछि टोटेनहम पहिलो हाफमा ३-० ले अघि रह्यो।
तर, दोस्रो हाफमा वेस्ट ह्याम खेलमा फर्कियो। ८२ औं मिनेटमा फाबियनले गोल गर्दै वेस्टह्यामलाई ३-१ को स्थितिमा ल्याए।
८५ औं मिनेटमा टोटेनहमका डेभिनसन सान्चेजले आत्मघाती गोल गरेपछि खेल ३-२ भयो।
त्यसपछि खेलको ९० औं मिनेटमा मानुएलले गोल गर्दै खेल ३-३ को बराबरी गर्दै वेस्टह्यामलाई हारबाट जोगाए।
बराबरीसँगै टोटेनहमले ५ खेलमा ८ अंक जोडेको छ। टोटेनहम तालिकाको छैटौं स्थानमा रहेको छ।
वेस्टह्याम भने आठौं स्थानमा रहेको छ। वेस्टह्यामले ५ खेलमा ७ अंक जोडेको छ।
