तिहारको रौनक भर्खरै सकियो। तिहारमा बनाएका सेलरोटी भने अझै धेरैका घरमा चियाको साथी बनिरहेका होलान्।

यसको रमाइलो उदाहरण त सामाजिक सञ्जालमा पनि देख्न सकिन्छ- सेलरोटी अहिलेको राष्ट्रिय खाजा!

तिहारपछिका दिनमा पनि चियासँग यही खाजाको स्वाद लिइराख्न पाइयोस् भन्दै युवा राजनीतिज्ञ रञ्जु दर्शनाले सेलरोटी व्यवसाय पुनः सुरू गरेकी छन्। काठमाडौंका सेलरोटी पारखीलाई रञ्जुले घर–घरमै सेल पुर्‍याइदिने व्यवस्था मिलाएको उनले जानकारी दिइन्।

रञ्जुले ०७४ सालमै आफ्नी आमाको सहयोगमा सेलरोटी पकाएर बिक्री गर्न थालेकी थिइन्। बीचमा कारणवश यसलाई निरन्तरता दिन सकिनन्। अहिले आएर फेरि उनी सेलरोटी व्यवसाय र प्रवर्द्धनमा अघि सरेकी हसन्।

‘सेलरोटीसँग हामी धेरैको बालापन जोडिएको छ। मलाई त खुबै मनपर्ने परिकार हो। बनाउन पनि जानेकी छु,’ सेलरोटी व्यवसायबारे रञ्जुले सेतोपाटीसँग भनिन्, ‘आफूले जानेको, मनपर्ने परिकारलाई व्यवसायकै रूपमा अघि बढाउने विचार गरेकी हुँ।’

पछिल्लो समय उनले आफ्नी आमासँग मिलेर सेलरोटी बेचेकी थिइन्। आमाले रोटी बनाएको देखेरै उनी यतातिर आकर्षित भएकी हुन्। पिठो बनाउनेदेखि गोलो रोटी बनाउँदासम्म ध्यान दिनु पर्ने हुँदा उनी यो कामलाई कलात्मक नजरले पनि हेर्छिन्।

‘आफन्तहरू मेरो ममीले राम्रो सेल पकाउन जान्ने भनेर तारिफ गर्नुहुन्थ्यो। मलाई पनि त्यस्तै हुन मन लाग्थ्यो,’ उनी भन्छिन्, ‘सबै प्रक्रिया हेर्दा र बुझ्दा राम्रो, मिठो सेल बनाउनु पनि एक किसिमको कला हो भन्ने बुझेँ।’

यसपटक भने उनले ६ जना साथीहरूसँग मिलेर सेलरोटी व्यवसाय अघि बढाएकी छिन्। एउटा सेलको २५ रुपैयाँ तोकिएको छ। २० वटाभन्दा धेरै अर्डर गर्नेलाई घरमै डेलिभरीको व्यवस्था रहेको रञ्जुले बताइन्।