‘अब सिङ आउँदैन, जुरो आउँदैन। उमेर पुगिसक्यो बिहे गर्नुपर्छ अब त!’
सुन्न चाहे पनि नचाहे पनि अचेल कानमा परिराख्ने कुरा।
कसैको बिहेमा जन्ती गयो, अब त तेरो पनि बेला भयो नि भन्ने सुन्न परिहाल्छ। यसो फेसबुकमा कोट लगाएको झिल्के फोटो अप्लोड गर्यो, ल अब दुलाहा बन्ने बेला भएछ है भन्ने खालको कमेन्ट आउँछ।
धेरैपछि भेटिएका आफन्ती भन्छन्- 'ओहो! पहिले त सानै थियो, अहिले त बिहे गर्ने भैसकेछ बाबु त।'
सबैले बेला भयो भनेको सुन्दा आखिर बेला कहिले हो त भनेर यसो घोतलिँदै थिएँ, बाटोमा 'बिहेवारी २० वर्ष पारि' भनेर लेखेको बोर्ड पो देखिन्छ। ३० वर्ष पुग्न दुई वर्ष बाँकी भएकालाई २० वर्ष लेखेको देख्दा त बेला हैन अबेला नै भएको हो कि क्या हो जस्तो पनि लाग्दो रहेछ।
