‘देशका युवा विदेशिने क्रम बढ्दो छ ।’ सुन्दा सामान्य लाग्ने यो वाक्यमा दुःख, विछोड र वेदनापूर्ण छ । वैदेशिक यात्रामा दुःख मात्रै छ र ? भन्ने प्रश्न पनि उठ्ला तर धेरैको भागमा दुःख नै पर्छ । रोजगारका लागि वैदेशिक यात्रामा गएका अधिकांश नेपाली खाडी मुलुकमा नै छन् । जसले ४५ देखि ५० डिग्रीसम्म घामको रापमा काम गर्नुपर्ने बाध्यात्मक अवस्था छ ।
एक अध्ययन अनुसार ८० देखि ९० लाख नेपाली विदेशमा छन् । रोजगारीका लागि होस् या अध्ययनका लागि, तीन करोड जनसङ्ख्यामा करिब एक करोड नेपाली विदेशतिरै छन् । विदेशतिर भएको प्रायः सबै युवा जनशक्ति नै छन् । ती युवा भनेको देशको विकास र समृद्धिका संवाहक शक्ति हुन् । त्यो जनशक्ति विदेश पलायन हुनु भनेको सबैभन्दा दुःखदायी अवस्था हो । देश युवाविहीन अवस्थामा छ ।
