कोरोना भाइरसको स्रंक्रमणबाट विश्वभर मृत्यु हुनेको संख्या झण्डै ९६ हजार पुगेको छ। बितेको २४ घण्टामा सात हजार १ सय ९७ जनाको मृत्यु भएसँगै कोरोनाका कारण ज्यान गुमाउनेको संख्या (यो समाचार तयार पार्दासम्म) ९५ हजार ७ सय १४ पुगेको छ।
संक्रमितको संख्याका हिसाबले सबैभन्दा धेरै प्रभावित अमेरिकामा बितेको २४ घण्टामा १८ सय ७२ जनाको मृत्यु भएको छ। संक्रमितको संख्या ४ लाख ६८ हजार २ सय ८६ पुगेको अमेरिकामा मृत्यु हुनेको संख्या १६ हजार ६ सय ६३ पुगेको छ।
सबैभन्दा धेरै प्रभावित इटाली बनेको छ। त्यहाँ १८ हजार २ सय ७९ जनाको मृत्यु भएको छ। बितेको २४ घण्टामा मात्रै त्यहाँ ६ सय १० जनाको मृत्यु भएको छ।
स्पेनमा १५ हजार ४ सय ४७ जनाले कोरोना भाइरसको संक्रमणबाट ज्यान गुमाएका छन् भने त्यहाँ संक्रमितको संख्या १ लाख ५३ हजार २ सय २२ पुगेको छ। यस्तै फ्रान्समा १२ हजार २ सय १० र बेलायतमा ७ हजार ९ सय ७८ जनाको कोरोना भाइरसको संक्रमणबाट मृत्यु भएको छ।
विश्वभर बितेको २४ घण्टामा ८४ हजार ४ सय ९३ जना नयाँ संक्रमित फेला परेका छन्। संक्रमित १६ लाख २ हजार ६ सय १९ जना मध्ये ३ लाख ५५ हजार ६ सय ७१ जना उपचारपछि निको भएका छन् भने ४९ हजार १ सय ४८ जनाको अवस्था गम्भीर रहेको छ।
