विराटनगर । कोसी अस्पतालमा १० दिनअघि भर्ना हुन आएका उदयपुर बेलका नगरपालिका १ का २३ वर्षीय पदम राईको एम्बुलेनसमै मृत्यु भयो । घटनाबारे ‘कोरोनासँग मिल्दोजुल्दो लक्षण देखिएको र आइसोलेसनमा भर्ना गर्न लाग्दा-लाग्दै मृत्यु हुन पुग्यो’ भन्दै कोसी अस्पतालले प्रस्टीकरण दियो । भर्ना नलिई विराट मेडिकल कलेजले एम्बुलेन्सबाटै उनलाई कोसीतर्फ रेफर गरिदिएको थियो ।
कोसी अस्पताल परिसरमा इमरजेन्सी वार्डनजिकै एम्बुलेन्स अडेको एक घण्टापछि राईको मृत्यु भयो । उनी अस्पतालमा भर्ना नै हुन पाएनन् । बरु मृत्युपछि पीपीई लगाएका स्वास्थ्य प्राविधिकहरुले शव एम्बुलेन्सबाट झिकेर स्वाब लिए । परीक्षण गर्न पठाइयो । तर, नतिजाचाहिँ ‘कोरोना नेगेटिभ’ भन्ने आयो ।
