गोकर्णेश्वर नगरपालिका ९ आरुबारीस्थित गैरी गाउँबाट एक महिला बेपत्ता भएकी छिन्।

स्थानीय ठेगाना सर्लाही भएकी १६ वर्षीया सुस्मिता मण्डल गएको सोमबार १० बजेदेखि बेपत्ता भएकी हुन्। 

२ हप्ता अगाडि एक महिनाको काखे छोरीलाई चेपेर माइत आरुवारी आएकी थिइन्, सुस्मिता। जहाँ उनकी आमा प्यारी माया लोहार बस्छिन्। 

गएको सोमबार आमालाई छोरी आरिया थमाउदै उनी श्रीमानले काम गरेको २५ सय रुपैयाँ लिनुपर्ने छ भन्दै थली गएकी थिइन्।

‘२५ सय रुपैयाँले बच्चाका लागि समान किन्नुछ भन्दै उनी घरबाट निस्केकी थिइन्’  लोहारले भनिन्, ‘आजसम्म घर आएकी छैनन्। कहाँ होला के गर्दै होला केही पत्तो पाउन सकेका छैनौं।’
 
उनी छोरीको भन्दा नातिनीको पिरले सताउन थालेको बताउछिन्।

आफ्नै छोरीप्रति कोध्रित भएकी उनी भन्छिन्, ‘ठुलो भएको मान्छे जतासुकै गएपनि मलाई मतलब थिएन। तर, छोरी सानै छ। कसले हेर्छ? मलाई मेरो छोरीको भन्दा नातिनीको पिर छ।’

लोहार काखे नातिनीकै लागि भएपनि छोरी खोजिदिन सारा नेपालीलाई गुहार्दैछिन्। 

‘कसैले मेरो छोरीलाई भेटाए उसलाई ५ हजार दिन्थे। कसैले भेटाउनु भए ९८१८३१३९५७/९८०८१९९८६७ यो नम्बरमा तुरुन्तै खबर गरिदिनु होला’, उनले भनिन्। 

दिलिप मण्डल र सुस्मिताले २ वर्ष अगाडी मात्र घरमा नभनी भागी विवाह गरेका थिए।

६ गते थलीमा पैसा लिन जान्छु भन्दै हिडेकी श्रीमतीले आमालाई छलेर गएको श्रीमान मण्डलको दाबी छ। ‘म पहिले थलीमै काम गर्थे। तर अहिले त्यहाँ काम गर्दिन। न त त्यहाँबाट मैले पैसा नै लिनुछ,’ उनले भने, ‘उनले किन र कहाँ जानका लागि कुरा छलेर गएकी हुन् त्यो मलाई  थाहा छैन्।’

उनी हालै कोटेश्वरमा फर्निचरको काममा आवद्ध छन्। उनले मासिक २० हजार कमाउछन्।