राष्ट्रियसभाका सदस्य एवं नेकपा एमाले माधव नेपाल पक्षका नेता डा. वेदुराम भुसालले दुईवटा कुरा प्रष्ट पारेका छन् ः एक– माधव नेपाल समूह तत्काल सरकारमा जाँदैन । दुई– शेरबहादुर देउवालाई प्रधानमन्त्री बनाउन गरिएको गठबन्धन तोडिँदैन ।
केपी शर्मा ओली एकतर्फीरुपमा अघि बढेका कारण एमालेभित्रको एकताको सम्भावना भने कम हुँदै गएको नेता भुसालले बताए । रातोपाटीसँग कुरा गर्दै उनले भने, ‘अर्को पक्ष एकपक्षीय ढङ्गले निर्णय गरेर गइरहेको छ, जसले गर्दा एमाले एकताको सम्भावना न्यून हुँदै गएको हो कि भन्ने देखिन्छ ।’
सरकारमा नजाने कुरा प्रष्टसँग भनिसक्दा पनि बुझाउन नसकिएको पो हो कि भन्ने गुनासो गर्दै भुसालले भने, ‘कति भोल्युमको आवाजमा भन्दा प्रष्ट हुन्छ, थाहा भएन । सार्वजनिकरुपमा शनिबार मात्रै माधव नेपालले अहिले सरकारमा जाने कुरा हाम्रो छैन भन्नुभएको छ ।’
माधव नेपाल समूहका कतिपय नेताहरूले ओली पक्षसँग गरिरहेको छलफल समूहका नेताहरुलाई जानकारी नदिई व्यक्तिगत ढंगबाट भइरहेको भुसालले बताए । सुरेन्द्र पाण्डे र भीम आचार्यको दिल्ली यात्रा पनि पार्टीलाई जानकारी नगराई भएको उनले बताए ।
