१३औँ संस्करणको साफ च्याम्पियनसिपको तयारी स्वरूप आज (बिहीबार) नेपाल र भारतबीच मैत्रीपूर्ण खेल हुँदैछ। बिहीबार साँझ साढे ५ बजे दशरथ रंगशालामा हुने पहिलाे खेलका लागि दुबै टिम जित्नै पर्ने दबावमा छन्। अर्काे खेल २० भदौमा  हुनेछ।

नेपालका अन्जन विष्ट र भारतका मानवीर सिंह प्लेयर्स टु वाचमा रहन्छन्।

अन्जन विष्ट - नेपाल 

भारतविरुद्ध मिडफिल्डर अन्जन नेपालका मुख्य हतियार हुन सक्छन्। २३ वर्षीय उनी प्रशिक्षक अब्दुल्लाह अल्मुताइरीका विश्वासिला खेलाडीसमेत हुन्। मध्यक्रममा यी खेलाडी बल होल्ड गर्न, लामा सट प्रहार गर्न, बल कन्ट्रोल गर्न माहिर छन्। अट्याकर अन्जन विपक्षी टोली डिफेण्डरका लागि टाउको दुखाइको विषय बन्न सक्छन्। भारतविरुद्ध अन्जनको रोल लामाे सटका लागि हुन सक्छन्। अन्जनले फिफा विश्वकप छनोट अन्तर्गत चाइनिज ताइपेविरुद्धको खेलमा गोल गरेका थिए।

घरेलु लिगमा मनाङ मर्स्याङदी क्लबको प्रतिनिधित्व गर्ने अन्जनले मिडलाइनसँगै अट्याकमा नवयुग श्रेष्ठसँग सहकार्य गर्न सक्छन्। उमेर समूहका विभिन्न प्रतियोगितामा नेपालको प्रतिनिधित्व गरिसकेका अन्जनले राष्ट्रिय टोलीबाट चार गोल गरेका छन्।

मानवीर सिंह - भारत 

भारतीय फुटबलका अट्याकर मानवीर सिंह बिहीबार दशरथ रंगशालामा उपस्थित सबैको नजरमा पर्नेछन्। पछिल्लो समय मानवीर भारतीय फुटबलका नियमित सदस्य हुन्। नेपालविरुद्ध मैत्रीपूर्ण खेलमा अट्याक लाइनमा मानवीरले कप्तान सुनिल क्षेत्रीसँग सहकार्य गर्नेछन्।

२५ वर्षीय मानवीरले सन् २०१७ मा मोरिससँगको खेलमा राष्ट्रिय टोलीबाट डेब्यु गरेका थिए। डेब्यु खेलमै प्रभाव जमाएका वेष्ट बंगानका यी खेलाडी त्यस यता भारतीय टोलीका नियमित सदस्य हुन्। मानवीर साफ सुजिकी कप २०१८ का गोल्डेन बुट विजेता समेत हुन्। गत महिना फिफा विश्वकप २०२२ अन्तर्गत भारतले कतारसँग ०-० को बराबरी खेल्दा मानवीरले भारतीय फुटबलमा ठूलो प्रशंसा पाएका थिए।

बल कन्ट्रोल, आफ्नो एरियामा सहजै विपक्षीलाई दबावमा राख्ने, बल होल्ड गर्ने, लामाे सट प्रहार गर्ने साथै राम्रो फिनिसरका रूपमा मानवीरलाई चिनिन्छ। सुपर लिग क्लब एटिके मोहन बंगालका यी खेलाडी एएफसी कपको समूहमा 'डि'मा सम्पूर्ण तीन खेल खेल्दै माल्दिभ्सबाट सीधैँ भारतीय टोलीमा जोडिएका हुन्। उनको प्रभाव प्रेरित एटिके मोहन बंगान नकआउट चरणमा प्रवेश गरेको छ।