अमेरिकामा सन् २०२२ मा १२ हजार १० जना नेपालीले ग्रिनकार्ड पाएका छन् ।अमेरिकाको डिपार्टमेन्ट अफ होमल्याण्ड सेक्युरिटीले सार्वजनिक गरेको एक प्रतिवेदनमार्फत् यो तथ्याङ्क बाहिरिएको हो ।
प्रतिवेदनअनुसार ग्रीनकार्ड पाउँनेमा दुईहजार आठसय ६६ अमेरिकी नागरिकका दम्पत्ति, २१ बर्षभन्दा कम उमेरका अविवाहित छोराछोरी र बाबुआमा रहेका छन् भने दुईहजार पाँचसय १० जना अमेरिकी नागरिकका २१ बर्ष काटेका छोराछोरी र ग्रिनकार्डवाहकका परिवारका सदस्य रहेका छन् ।
यसैगरी डाइभर्सिटी भिसाविजेता दुईहजार आठसय ९४, रोजगारमा आधारित ग्रिनकार्ड प्राप्त गर्ने दुईहजार चारसय ६३, शरणार्थीका रूपमा ग्रीनकार्ड प्राप्त गर्ने एकहजार दुईसय ६२ अन्य श्रेणीमा १५ जनाले ग्रीनकार्ड पाएका छन् ।
बितेका ६ वर्षको तथ्याङ्कलाई हेर्ने हो भने एकै वर्ष अमेरिकामा यति धेरै नेपालीले ग्रिनकार्ड पाएको यो पहिलो पटक हो । यो संख्या विगत ६ बर्षयता ग्रीनकार्ड पाउँने नेपालीको सबैभन्दा उच्च संख्या हो । यसअघि सन् २०१६ मा १२ हजार आठसय ५१ नेपालीले ग्रीनकार्ड पाएका थिए ।
त्यसपछिका वर्षहरूमा सन् २०१७ मा ११ हजार ६ सय १०, सन् २०१८ मा ११ हजार ९ सय ५३, सन् २०१९ मा १० हजार २ सय १, सन् २०२० मा ७ हजार ८ सय ४७,र सन् २०२१ मा सातहजार तीनसय नौ नेपालीले ग्रीनकार्ड पाएका थिए ।
