नागरिक उन्मुक्ति पार्टी (नाउपा) का संरक्षक रेशम चौधरीले ज्यान मार्ने धम्कीबारे हल्लाको पछाडि नलाग्न आग्रह गरेका छन्। 

सोमबार पार्टीको बैठकमा कुटाकुट र ज्यान मार्ने धम्कीको विषय सार्वजनिक भएपछि उनले यस्ताे बताएका हुन्।

चौधरीले पार्टी कसैको पेवा नभएको भन्दै चौधरीले चैत्र २३ र २४ गते हुने केन्द्रीय समितिको बैठकले जे निर्णय गर्छ, त्यसलाई स्विकार्ने बताए।

उनले सामाजिक सञ्जालमार्फत भनेका छन्, 'पार्टीको बैठकमा कस्ले कसलाई हातपात गर्‍यो ? ज्यान मार्ने धम्कि कसले दियो? सुन्ने हेर्ने साथीहरू साक्षी छन्। जसरी पनि मलाई जेल हालेर सत्ताको हालिमुहाली गर्ने स्वार्थीहरुको पछाडी हामी लाग्दैनौँ। अनावश्यक हो- हल्लाको पछि नलागौँ। चैत २३ र २४ हुने केन्द्रिय समितिको बैठकले जे निर्णय गर्छ त्यही स्वीकार्ने हो। पार्टी कसैको पेवा होइन पहिचान बादीहरुको साझा आवाज हो।'

नाउपाको आज अनामनगरस्थित पार्टी कार्यालयमा चौधरी समर्थक केन्द्रीय सदस्यले अध्यक्ष रन्जिता श्रेष्ठ समर्थक केन्द्रीय सदस्यलाई कुटपिट गरेको र ज्यान मार्ने धम्की दिएको आरोप लागेको छ।