बार्सिलोनाका डिफेन्डर जोर्डी अल्बा करिब दुई साता मैदान बाहिर रहने भएका छन् ।
च्याम्पियन्स लिग फुटबलको समूह ‘एफ’ मा स्पेनिस क्लब बार्सिलोना र जर्मन क्लब बोरुसिया डर्टमन्डबीचको खेलको दौरानमा उनी घाइते हुन पुगेका थिए । डर्टमन्डविरुद्ध पहिलो रोजाइमा परेका अल्बाको खेलकै दौरानमा देब्रे खुट्टामा चोट लागेको थियो ।
उनी खेल्न नसक्ने भएपछि खेलको ४० औं मिनेटमा मैदानबाट बाहिरिएका थिए भने उनको स्थानमा सेर्गी रोबेर्टोलाई बार्सिलोनाले मैदानमा छिराएको थियो ।
मेडिकल टेष्टपछि उनी करिब १० देखि १५ दिनसम्म मैदान बाहिर नै रहने मार्काले लेखेको छ ।योसँगै अब अल्बाले स्पेनिस ला लिगा फुटबल अन्तर्गत ग्रानाडासँग हुने खेल गुमाउने छन् ।
