नेपालगञ्जस्थित भेरी अस्पतालमा कोरोना विशेष अस्पताल निर्माणका लागि नेपालगञ्ज उद्योग वाणिज्य सङ्घले रु. ५ लाख ५१ हजार सहयोग गरेको छ।
निजी क्षेत्रका उद्योगी व्यवसायीको छाता सङ्गठनका रुपमा रहेको उद्योग वाणिज्य सङ्घले सामाजिक उत्तरदायित्व बहन गर्दै आर्थिक सहयोग गरेको सङ्घका अध्यक्ष अब्दुल वाहिद मन्सुरीले जानकारी दिए।
सङ्घका अध्यक्ष मन्सुरीले कोरोना विशेष अस्पताल निर्माण समितिका संयोजक डा. श्यामसुन्दर यादवलाई आज उक्त रकम वरावरको चेक हस्तान्तरण गरेका हुन्।
कोभिड सङ्कट समाधानका लागि बाँकेका निजीक्षेत्र सक्रियतापूर्वक लागेको स्मरण गर्दै अध्यक्ष मन्सुरीले आगामी दिनमा पनि अभियान जारी रहने उल्लेख गरे।
अध्यक्ष मन्सुरीले आर्थिक सहयोगका लागि अगाडि सरेका नेपालगञ्जका उद्योगी, व्यवसायीलाई सङ्घका तर्फबाट धन्यवाद समेत व्यक्त गरेका छन्। अस्पताल निर्माणका लागि उद्योग वाणिज्य सङ्घले आर्थिक सहयोग गरेकोमा कोभिड विशेष अस्पताल निर्माण समितिका संयोजक डा. यादवले आभार प्रकट गरे।
बाँकेका प्रमुख जिल्ला अधिकारी रामबहादुर कुरुम्बाङ्गले कोरोना सङ्कट समाधानमा निजीक्षेत्रले महत्वपूर्ण भूमिका निभाउदै आएको बताए। उनले स्वास्थ्य मापदण्ड पालना सन्तोषजनक भएको तर त्यसैमा हौसिने अवस्था नरहेकोले सचेत रहन आग्रह समेत गरे। नेपालगञ्ज उद्योग वाणिज्य सङ्घले कोभिड विशेष अस्पताल निर्माणसँगै यसअघि पनि विभिन्न क्षेत्रमा आर्थिक एवं स्वास्थ्य सामग्रीको सहयोग गरेको महासचिव चिरञ्जीवी वलीले जानकारी दिए।
भेरी अस्पतालका अध्यक्ष प्रमोद धितालले कोभिड अस्पताल निर्माणको अभियान शुरु भएको छोटो समयमै निजी क्षेत्र र सरकारी कर्मचारीको तर्फबाट भएको आर्थिक सहयोग उत्साहजनक रहेको बताए।
