शेयरबजारले सोमबार अहिलेसम्मकै अर्को उच्च विन्दु नेप्से सूचक २०२८ सम्म पुगेको छ। २०२८ विन्दुसम्म पुगेको बजार फर्किएर २००० हजारमुनि आएर बन्द भएको हो ।
कारोबार रकममा पनि उछाल आउनेक्रम जारी छ । लगानीकर्ताको उत्साहमा कत्ति पनि कमी देखिएको छैन । वाणिज्य बैंक समूहको सूचकमा सोमबार केही 'करेक्सन' आए पनि बीमा लगायतका समूहहरुमा तेजी जारी छ ।
जति बढी आपूर्ति भए पनि बजार धमाधम खपत गरिरहेको ब्रोकरहरुको भनाइ छ । अनलाइन प्रविधि प्रयोगका कारण लगानीकर्तालाई सेयर खरिदबिक्रीमा निकै सजिलो भएको छ । घरमै बसेर आफैंले सेयर किनबेच गर्नसक्ने भएका छन् । यसबाट कारोबार रकममा अझै उछाल आउन सहयोग पुगेको हो । सस्तो ब्याजदरले पनि सर्वसाधारण लगानीकर्ताको आकर्षण सेयरबजारमा थप विस्तार भएको हो ।
नेप्से सूचक २८.७९ अंकले बढेर १९९७.०५ विन्दुमा आइपुगेको छ । १९८ कम्पनीको ८ अर्ब ८६ करोड ७७ लाख रुपैयाँभन्दा बढीको कारोबार भएको छ । २ करोड ५१ लाख ९१ हजारभन्दा बढी कित्ता कारोबार भएको छ ।
कुल १२ समूहको सेयर कारोबाार भएकामा ४ वटा समूह तल झरेका छन् भने बाँकी समूहका सूचक माथि लागेका छन् । निर्जीवन बिमा समूह सबैभन्दा धेरै ८२३.३५ अंकले बढेको छ ।
