२० साउन, काठमाडौं । देशभर कोरोना भाइरस (कोभिड–१९) संक्रमणको ग्राफ बढ्दै गएपछि प्रधानमन्त्री केपी शर्मा ओलीले मंगलबार जनस्वास्थ्यदेखि आर्थिक क्षेत्रका विज्ञहरुलाई बालुवाटारमा डाके । त्यहाँ झण्डै साढे चार घण्टा छलफल भयो ।
प्रधानमन्त्रीनिवास बालुवाटारमा भएको छलफलमा विपक्षी नेपाली कांग्रेसका सभापति शेरबहादुर देउवा र जनता समाजवादी पार्टीका अध्यक्ष महन्थ ठाकुरलाई समेत सहभागी गराइएको थियो । स्वास्थ्य क्षेत्रका साथै केही अन्य क्षेत्रका विज्ञलाई पनि छलफलमा मिसाइएको थियो ।
जनस्वास्थ्यविज्ञ डाक्टर समीरमणि दीक्षित योपटक विज्ञहरुबाट प्रधानमन्त्रीले दुईवटा कुरा बुझ्न चाहेको बताउँछन् ।
पहिलो : विज्ञहरुको बुझाइमा अहिले देशमा के भइरहेको छ ?
दोस्रो : कोरोना संक्रमण नियन्त्रणका लागि सरकारले के गर्नुपर्छ ?
छलफलमा सहभागीहरुका अनुसार अधिकांश समय अब लकडाउनको मोडल कस्तो हुनुपर्छ भन्ने विषयमा बहस भयो ।
