भारतका पूर्व राष्ट्रपति प्रणव मुखर्जीको स्वास्थ्य अवस्था गम्भीर बनेपछि उनकी छोरीले भावुक स्टाटस लेखेकी छन् ।
सामाजिक सञ्जाल ट्विटरमा स्टाटस लेख्दै प्रणव मुखर्जीकी छोरी शर्मिष्ठाले भगवानले सही बाटो रोज्ने भन्दै आफूलाई हिम्मत दिन भनेकी छन् ।
छोरी शर्मिष्ठाले बाबुका लागि प्रार्थना गर्दैै एक वर्ष पुरानो कुरा स्मरण गरेकी छन् । उनले गत वर्ष यही समयमा सर्वोच्च नागरिक सम्मान भारत रत्नबाट सम्मानित भएको स्मरण गर्दै यस वर्ष गम्भीर बिरामी भएको बताएकी छन् ।
शर्मिष्ठाले लेखेकी छन्, ‘गत वर्ष ८ अगस्ट मेरो जीवनको सबैभन्दा खुसीको दिन थियो, जब मेरा बाबुलाई भारत रत्न प्राप्त भएको थियो । अब एक वर्षपछि १० अगस्टमा उहाँ गम्भीर बिरामी हुनु भएको छ । भगवानले उहाँका लागि राम्रो गरुन् र मलाई जीवनको सुख दुःख स्वीकार गर्ने क्षमता देउ । म सबैलाई धन्यवाद दिन चाहन्छु ।’
कोरोना संक्रमणपछि १० अगस्टमा अस्पताल भर्ना भएका उनको मस्तिष्कको एक भागको शल्यक्रिया गरिएको थियो ।
यो आपतकालीन शल्यक्रिया उनको जीवन रक्षाका लागि आवश्यक भएको चिकित्सकहरुले बताएका थिए । तर शल्यक्रियापछि उनको अवस्था गम्भीर बनेको छ र भेन्टिलेटरमा राखिएको छ ।
यसअघि पूर्व राष्ट्रपति मुखर्जी आफैंले ट्विट गरेर आफूलाई कोरोना संक्रमण देखिएको जानकारी दिएका थिए ।
उनले आफूलाई कोरोना संक्रमण देखिएको भन्दै आफ्नो सम्पर्कमा आएका सबैलाई आइशोलेशनमा बसेर परीक्षण गराउन अनुरोध गरेका थिए ।
