सानो पाइलाद्वारा सञ्चालित परियोजना स्कुल अफ वुमन्स अन्टरप्रेनरसिप अन्तर्गत ललितपुरमा सुरू भएको हस्तनिर्मित गरगहना बनाउने तालिमको आज औपचारिक उद्घाटन भएको छ।

तालिमअन्तर्गत आधारभूत प्रयोगात्मक सत्रमा सहभागी प्रशिक्षार्थीहरूले बनाएका गहनाहरूको प्रदर्शनी पनि उद्घाटन स्थलमै आयोजना गरिएको थियो।

उद्घाटन तथा पहिलो प्रदर्शनीका प्रमुख अतिथि कानुन न्याय तथा संसदीय मामिलामन्त्री अजयकुमार चौरसियाले महिलाहरूलाई सीप सिकाएर उद्यमी बनाउने सानो पाइलाको प्रयासको प्रशंसा गरे।

‘जहाँजहाँ समस्या हुन्छ, त्यहाँत्यहाँ सानो पाइला समाधानसहित पुगेको मैले पाएको छु। दुर्व्यसनमा फसेका युवाहरूलाई पुनर्स्थापना गर्ने काम होस् वा अपराधमा फसेका युवाहरूलाई सुधारको बाटो देखाएर समाजमा घुलमिल बनाउने सवालमा होस्, सानो पाइलाले धेरै नै उल्लेख्य कामहरूको इतिहास बनाएको छ’, मन्त्री चौरसियाले सानो पाइलाको इतिहासबारे चर्चा गर्दै भने, ‘अहिले दिइँदैगरेको यो हस्तनिर्मित गहना बनाउने तालिमपछि प्रशिक्षार्थीहरू आत्मनिर्भर र स्वाबलम्बी बन्ने मलाइ विश्वास छ।’

त्यस्तै प्रदेश सांसद श्याम पटेलले कोरोनाकालमा सानो पाइलाले अद्भूत काम गरेको आफूले प्रत्यक्ष देखेको भन्दै प्रशंसा गरे। सानो पाइलाले गरेको काम सफल हुनेमा दुइमत नरहेको भन्दै प्रदेश सांसद पटेलले अगाडि भने, ‘यो तालिमपछि महिला प्रशिक्षार्थीहरू प्रमाणपत्र लिएर जाने मात्र नभइ स्वाबलम्वी हुनुहुनेछ भन्नेमा म विश्वस्त छु।’

नेपाल उद्योग वाणिज्य महासंघका उपाध्यक्ष कमला श्रेष्ठले महिलाहरूलाई उद्यमी बनाउने सानो पाइलाको प्रयासमा आफूबाट सक्दो सहयोग हुने बताए।

‘दुरदराजका विभिन्न किसिमका दुखमा परेका महिलाहरूलाई उद्यमी बनाउने सत्प्रयासमा मेरो व्यक्तिगत र मैले प्रतिनिधित्व गर्ने उद्योग वाणिज्य महासंघको तर्फबाट सक्दो सहयोग हुनेछ’, सौन्दर्य व्यवसायी समेत रहेकी श्रेष्ठले अगाडि भने, ‘सहरी क्षेत्रका र शिक्षित महिलाहरूले उद्यमशिलताका क्षेत्रमा अवसर पाए पनि विपन्न र जोखिममा परेका महिलाहरूलाई अझै पनि त्यो अवसर प्राप्त भइसकेको छैन। त्यसैले म माननीय मन्त्रीज्यूलाई यसतर्फ नीतिगत र कानुनीरूपमै सहजता दिलाउनका लागि भूमिका खेलिदिनुहोस् भनी ध्यानाकर्षण गराउन चाहन्छु।’

सानो पाइलाका संस्थापक अध्यक्ष कञ्चन झाले संस्थाको स्थापनाको इतिहासबारे चर्चा गरे। अधिकार विकेन्द्रिकरणको अवधारणाअन्तर्गत आफूहरूले वीरगञ्जमा मुख्यालय खोलेर काठमाडौँलगायत अन्य ठाउँहरूमा काम गरिरहेको बताएका झाले कानुनमन्त्री चौरसियाको ध्यानाकर्षण गराउँदै भने, ‘वीरगञ्जमा रहेर हाम्रो अभिभावकत्व निर्वाह गरिरहनुभएका मन्त्रीज्यू, प्रदेश सांसदज्यू पनि यहाँ हुनुहुन्छ, सानो पाइलाले गरिरहेका काममा सुरुआतदेखि नै तपाईंहरूको सहयोग छ र यस्ता कार्यक्रमहरूमार्फत महिलाहरूको उन्नति-प्रगतिमा पनि भविष्यमा सहयोग भइरहने छ भन्ने मेरो अपेक्षा हो।’

संस्थापकको हैसियतमा आफ्ना कुराहरू राख्न दिएकोमा पनि झाले सानो पाइला परिवारलाई धन्यवाद दिए।

स्कुल अफ वुमन्स अन्टरप्रेनरसिप परियोजनामा आर्थिक सहायता उपलब्ध गराएको गिभ टु एसियाका नेपाल प्रतिनिधि शुरेश तामाङले सानो पाइलासँगको लामो सामिप्यताबारे चर्चा गरेका थिए।

उनले भने, ‘सानो पाइलाको मधेशदेखि पहाडसम्म फैलँदो यात्रामा हाम्रो साझेदारी पनि निरन्तर चलिरहोस्  भन्ने हामीले चाहेका छौँ। हामीसँगको साझेदारीमा ललितपुर र पर्सामा जारी स्कुल अफ वुमेन्स अन्टरप्रेनरसिप परियोजना पनि पक्कै सफल हुनेछ।’

आवासीय तालिम केन्द्र सञ्चालन भइरहेको गोदाबरी नगरपालिका-३ टौखेलका वडाध्यक्ष सानुराजा घिमिरे (राज)ले सानो पाइलाले जोखिममा परेका महिलाहरूलाई सीप सिकाएर उदाहरणीय काम गरिरहेको भन्दै आफ्नो वडाबाट हुने सहयोगका लागि हरसम्भव प्रयास गर्ने प्रतिबद्धता जनाए।

कार्यक्रममा परियोजना प्रमुख साधना पोखरेलले स्वागत मन्तव्यसहित परियोजनाबारे जानकारी गराएका थिए। त्यस्तै परियोजनाका वरिष्ठ कलाकार भीमा बस्यालले सानो पाइलासँग आफू एक दशक अघि जोडिएको कथा साझा गरेका थिए।

सानो पाइलाका सभापति सुदीप कुमार तामाङ लामाको सभापतित्वमा भएको उद्घाटन समारोह सानो पाइलाका अपरेसन हेड विवेक कर्णले संचालन गरेका थिए।

उद्घाटन समारोहपछि प्रमुख अतिथिसहित अतिथिहरूले प्रदर्शनीको अवलोकन गरेका थिए।