किर्गिस्तानमाथि नेपालको गोल वर्षा, सावित्राको मात्रै ४ गोल

तस्बिरः बिएल

किर्गीस्तानमा जारी नादेझ्दा कप फुटबलमा नेपालले सानदार सुरूवात गरेको छ। आइतबार भएको प्रतियोगिताको पहिलो खेलमा नेपालले आयोजक किर्गिस्तानलाई ८-२ गोल अन्तरले हराउँदै उत्कृष्ट सुरूवात गरेको हो।

काराकोलस्थित सेन्ट्रल स्टेडियममा नेपाललाई जिताउन सावित्रा भण्डारीले ह्याट्रिकसहित ४ गोल गरिन्।  यस्तै अनिता बस्नेतले दुई तथा दिपा राई र कप्तान निरू थापाले एक एक गोल गरिन्।

खेलको तेस्रो मिनेटमा कप्तान निरूको पासमा गोलको खाता खोलेकी सावित्राले १५ औं मिनेटमा नेपालको अग्रता दोब्बर पारिन्। किर्गिस्तानले १९ औं र २२ औं मिनेटमा गोल गर्दै खेललाई बराबरीमा ल्याएको थियो। तर २५ औं मिनेटमा दीपाले गोल गर्दै  खेलमा नेपालले पुन: अग्रता लियो।

सावित्राले ३० औं मिनेटमा गोल गर्दै ह्याट्रिक पूरा गरिन्। सावित्राकै पासमा अनिताले ३४ औं र अनिताको पासमा निरूले ३७ औं मिनेटमा गोल गर्दै नेपालको अग्रता फराकिलो बनाइन्।

पहिलो हाफमा आधा दर्जन गोल गर्दै फराकिलो अग्रता बनाएको नेपालले दोस्रो हाफमा पनि आक्रमण जारी राख्यो। खेलको ५३ औं मिनेटमा सावित्राले पेनाल्टी क्षेत्रको ठिक बाहिर प्राप्त फ्रिकिकलाई सिधै गोलमा परिणत गर्दै नेपाललाई ७-२ गोलले अगाडि पुर्‍याइन्।

खेल सकिन २ मिनेट बाँकी रहँदा मन्जलीकुमारी योन्जनको प्रहार पोस्टमा लागेर बाहिरिँदा नेपालले अग्रता बढाउन सकेन। निर्धारित समयको अन्तिम मिनेटमा अनिता बस्नेतले पेनाल्टी क्षेत्रभित्रबाट उत्कृष्ट फिनिसिङ गर्दै नेपालको फराकिलो जित सुनिश्चित गरिन्।

यसअघि आजै भएको पहिलो खेलमा उज्बेकिस्तानले ताजिकिस्तानमाथि १२-० को फराकिलो जित दर्ता गरेको थियो। पहिलो चरणको खेल सकिँदा उज्बेकिस्तान शीर्षस्थानमा छ भने नेपाल गोल अन्तरको आधारमा दोस्रो स्थानमा छ।

नादेझ्दा कपमा सहभागी चार देशका टोलीले ५ दिनमा ४ खेल खेल्नु पर्नेछ। नेपालले भोलि हुने खेलमा उज्वेकिस्तानसँग खेल्नेछ। मंगलबार ताजिकिस्तानको सामना गर्नेछ।

राउन्ड रोविन लिगपछि शीर्ष २ टोलीले बिहीबार उपाधिका लागि खेल्नेछन् । तेस्रो स्थानको खेल पनि बिहिबारनै हुनेछ ।

प्रकाशित मिति: : 2019-09-08 18:07:43

प्रतिकृया दिनुहोस्