बसन्त रानाभाट
अरुबेला पर्यटकहरुले भरिभराऊ हुने इटाली अहिले गम्भीर संकटसँग जुधिरहेको छ । दैनिक रुपमा केही सय मानिसले ज्यान गुमाइरहेका छन् । पर्यटकहरु व्यवस्थापन गर्न हम्मेहम्मे पर्ने शहरहरुमा अहिले मानिसहरुको शव सम्हाल्न मुस्किल छ । त्यहाँका दृश्यहरु कारुणिक छन् ।
डेढ महिना अगाडिसम्म इटालीमा यस्तो अवस्था आउला भनेर कसैले पनि कल्पना गरेका थिएनन् । तर, डिसेम्बर अन्तिममा चीनबाट सुरु भएको कोरोना भाइरस (कोभिड-१९) को महामारीले इटालीमा युद्धग्रस्त मुलुकभन्दा पनि ठूलो संकटमा ल्यायो । शनिबार बिहानसम्म इटालीमा नौ हजार एक सय ३४ जनाको मृत्यु भएको छ भने ८६ हजार ४ सय ९८ जना संक्रमित भएका छन् ।
