अर्जेन्टिनी राष्ट्रिय फुटबल तथा क्याटलान क्लब बार्सिलोना कप्तान लिओनेल मेसीले करीअरमा ७ सय गोल पूरा गरेका छन्।
मंगलबार एटलेटीकोविरुद्ध खेलमा गोल गर्दै मेसीले ७ सय गोल पूरा गरेका हुन्।
मेसीले खेलको ५० औं मिनेटमा पेनाल्टीमार्फत गोल गरेका थिए।
गत साता मात्र ३३ वर्ष पुगेका मेसीले ७ सय मध्ये ७० गोल अर्जेन्टिनाको जर्सीमा गरेका छन्। बार्सिलोनाका लागि भने उनले ६ सय ३० गोल गरेका छन्।
हाल खेलिरहेका खेलाडीमा रोनाल्डोले मात्र मेसीलाई उछिनेका छन्। रोनाल्डोले १ हजार ३ खेल खेल्दै ७ सय २६ गोल गरेका छन्। उनले स्पोर्टिङ लिस्बन, म्यानचेस्टर युनाइटेड, रियल म्याड्रिड र युभेन्ट्सबाट व्यावसायिक फुटबल खेलेका छन्।
यता मेसीले ८ सय ६० खेल खेल्दै यो उपलब्धि हासिल गरेका हुन्। रोनाल्डोले भने झन्डै १ सय खेल बढी खेल्दै यो कीर्तिमान आफ्नो नाम गरेका थिए।