अमेरिकी राष्ट्रपति डोनल्ड ट्रम्पले ‘भर्च्युअल प्रेसिडेन्सियल डिबेट’ गराउने प्रस्ताव अस्वीकार गरेका छन्।
कोरोना भाइरसको संक्रमणका कारण आइसोलेसनमा रहेका उनले अक्टोबर १५ का लागि निर्धारित ‘प्रेसिडेन्सियल डिबेट’ भर्च्युअल गर्न अस्वीकार गरेका हुन्।
कोरोना भाइरसबाट संक्रमित भइ स्वास्थ्यमा समस्या देखिएपछि वाल्टर रीड मिलिटरी मेडिकल सेन्टरमा भर्ना भएका उनी पूर्णरूपमा ठीक नहुँदै ३ दिन अस्पतालमा बसेर डिस्चार्ज भएका थिए।
सोमबार बेलुका ह्वाइट हाउस फर्किएका उनी त्यसको २ दिनपछि आज ह्वाइटहाउस स्थित ओवल अफिसमा पुगेका थिए। ओवल अफिस पुगेर ट्वीटरमा भिडियो सन्देश दिएका ट्रम्पले आफूमा कुनै स्वास्थ्य समस्या नभएको बताएका छन्।
यद्यपी प्रेसिडेन्सियल डिबेटमा भाग लिन भने अस्वीकार गरेका छन्।
निर्वाचनअघि राष्ट्रपतिका उम्मेदवारले डिबेटमा भाग लिने परम्परा १६४ वर्ष पुरानो हो। दोस्रो ‘प्रेसिडेन्सिय डिबेट’ १५ अक्टुबरमा फ्लोरिडाको मियामी टाउन हलमा निश्चित थियो। यसमा सर्वसाधारणको प्रश्नको उत्तर दिने तालिका पनि तय गरिएको थियो।
तर, कोरोना भाइरसको कारण डिबेट गराउने संस्थाले आगामी डिबेट भर्च्युअल गर्न प्रस्ताव गरेको थियो। यद्यपी ट्रम्पले यस्तो योजना हास्यास्पद रहेको बताए।
ट्रम्पले भनेका छन्, ‘म भर्च्युअल डिबेटमा आफ्नो समय बर्बाद गर्दिनँ। बहस यस्तो हुँदैन। कम्युटरको पछिल्तिर बसेर डिबेट गर्नु हास्यास्पद हो।’
ट्रम्प दम्पतीलाई गत साता कोरोना संक्रमण भएको हो। उनीहरु क्यारेन्टाइनमा छन्।
चुनाव अघिसम्म ट्रम्पले कोरोनालाई खासै महत्व दिएका थिएनन्। उनी सार्वजनिक समारोहमा दुई पल्ट मात्र मास्क लगाएर उपस्थित भएका थिए।
उनले मास्क लगाएको विषयलाई लिएर वाइडेनको थुुप्रै ठाउँमा मजाक पनि उडाएका थिए। तर, चुनावको मुखमा आफै कोरोनाबाट ढल्न पुगेपछि चुनावी अंकगणितमा पनि यसले ठूलो महत्व राख्ने बताइएको छ।
ट्रम्प हाल ७४ वर्षमा प्रवेश गरिसकेका छन्। त्यसैले उनी तुरुन्त स्वास्थ्य लाभ गरेर चुनावी माहौलमा फर्किहाल्छन् भन्ने कुरामा पनि आशंका व्यक्त गरिएको छ।
