उत्तर कोरियाले थप ३० हजारभन्दा धेरै आफ्ना सैनिकहरू रुस पठाउने योजना बनाइरहेको छ। उत्तर कोरियाली ती सैनिकहरू युक्रेनसँग लडिरहेका रुसी सैनिकहरूको अग्रपङ्त्तिमा तैनाथ हुनेछन्। 

अमेरिकी सञ्चारमाध्यम सिएनएनले जनाएअनुसार केही दिनभित्रै ती सैनिकहरू रुस पुग्नेछन्। यसअघि गत वर्षको नोभेम्बरमा पनि उत्तर कोरियाले लगभग ११ हजार सैनिक रुस पठाएको थियो। तीमध्ये कम्तीमा पनि ४ हजार सैनिक युक्रेन युद्धमा मारिएको अनुमान छ। 

ती उत्तरकोरियाली सैनिकहरू अग्रभागमा खटेर रुसको कुर्स्क क्षेत्रमा युक्रेनको आक्रमणलाई निस्तेज गर्न सघाएका थिए। यो क्षतिका वाफजुद पनि उत्तर कोरियाले रुसमा आफ्ना सैनिक पठाउन छोडेको छैन। र बरु उसले यसलाई रुससँगको बलियो सैन्य साझेदारीका रुपमा ब्याख्या गरेको छ। 

सिएनएनले रुसको एउटा गोप्य सुरक्षा दस्तावेजका आधारमा यो समाचार प्रकाशित गरेको जनाएको छ। त्यो प्रतिवेदनअनुसार उत्तर कोरियाली ती सैनिकहरूलाई युक्रेनसँगको ठूला लडाईंहरूमा खटाइने छ। 

उत्तर कोरियाली सैनिकहरू हजारौं किलोमिटर पार गरेर साइबेरिया हुँदै रुसको युद्ध क्षेत्रतर्फ प्रस्थान गरिसकेका छन्। त्यसका लागि युद्धपोत बिमानहरू, तथा सामुद्रिक हतियारहरू र बन्दोबस्तीका सामग्रीहरू रुसले तयारी अवस्थामा राखेको छ। वायु सेनाका लागि कैयौं विमानस्थलहरू र जलसेनाका लागि बन्दरगाहहरू पनि तयारी अवस्थामा छन्। 

रुस र उत्तर कोरियाबीच राजनीतिक र कुटनीतिक सम्बन्ध झाँगिदै जाँदा अब सैन्य साझेदारी पनि बलियो हुँदै गएको देखिन्छ। 

सन् २०२२ नोभेम्बरदेखि रुस र युक्रेनबीच भीषण युद्ध अहिले पनि जारी छ। विभिन्न देशहरूले युद्ध रोक्नका लागि मध्यस्थता गरिरहे पनि त्यहाँ युद्धबिराम हुन सकेको छ। 

दोस्रो कार्यकाल सम्हालेलगत्तै अमेरिकी राष्ट्रपति डोनाल्ड ट्रम्पले पनि त्यो युद्ध रोक्ने प्रयत्न गरेका थिए। तर उनी पनि सफल हुन सकेनन्। अहिले पनि ट्रम्पका दूतहरू रुस र युक्रेनसँग निरन्तर संवाद गरिरहेका छन्।