अमेरिकी राष्ट्रपति डोनाल्ड ट्रम्प ‘प्रशासन’ले शुक्रबार ‘गल्फ अफ मेक्सिको’को नाम फेरेर ‘गल्फ अफ अमेरिका’ राख्ने घोषणा गरेको छ। तर गुगल र एप्पलको लोकप्रिय म्याप सेवाहरूले भने अझैपनि पुरानो नाम देखाइरहेका छन्।

ट्रम्पको घोषणाले विश्व राजनीतिसँगै मेक्सिकोमा हलचल मच्चाइरहेका बेला सोमबार गुगलले भन्यो, ‘अमेरिकी सरकारको आधिकारिक म्यापहरू अद्यावधिक भएपछि गुगलले पनि गल्फ अफ अमेरिकालाई देखाउनेछ। यो नयाँ कुरा होइन, लामो समयदेखिको अभ्यास हो।’

राष्ट्रपति ट्रम्पले आफ्नो पहिलो कार्यकालको पहिलो दिनमै कार्यकारी आदेश जारी गर्दा उत्तर अमेरिकाको सबैभन्दा अग्लो पहाडको नाम परिवर्तन गर्ने घोषणा गरेका थिए। त्यो पहाडको नाम पनि गुगल म्याप्सले परिवर्तन गरेको थियो। 
अमेरिकी भू-गर्भ सर्वेक्षणमार्फत् आधिकारिक म्यापहरू अद्यावधिक गर्दै लैजाने अमेरिकी आन्तरिक विभागले जनाएको छ।

सरकारले आधिकारी रुपमा ‘गल्फ अफ मेक्सिको’को नाम परिवर्तन गरेपछि गुगलले तुरुन्तै लागू गर्ने गुगल कम्पनीका एक अधिकारीले जनाएका छन्। गुगल म्याप्स अरबौँ प्रयोगकर्ताहरूको लागि भौगोलिक जानकारीको महत्वपूर्ण स्रोत हो। गुगलका अनुसार, अमेरिकी प्रयोगकर्ताहरूले गल्फ अफ अमेरिकाको नाम देख्नेछन्, तर मेक्सिकोमा रहेका प्रयोगकर्ताहरूले गल्फ अफ मेक्सिकोको नाम देख्न देख्नेछन्।

गुगल स्रोतकाअनुसार विश्वभरका अन्य स्थानका प्रयोगकर्ताहरूले भने दुवै नाम सँगसँगै देख्नेछन्। यी प्रयोगकर्ताहरूका लागि पहिले ‘गल्फ अफ मेक्सिको’को नाम देखिनेछ, त्यसपछि कोठाभित्र ‘गल्फ अफ अमेरिका’को नाम राखिनेछ। तर गुगल कम्पनीका प्रवक्ताले यी दुई नामहरूको क्रमबारे टिप्पणी गर्न अस्वीकार गरेका छन्।

त्यस्तै, एप्पलका प्रतिनिधिहरूले आफ्नो म्याप्समा गल्फ अफ अमेरिकाको नाम लागू गर्ने वा नगर्नेबारे कुनै प्रतिक्रिया दिएका छैनन्।

गुगल म्याप्सले विशेष गरी भू-राजनीतिक विवाद भएका स्थानहरूमा प्रयोगकर्ताको स्थानअनुसार एउटै ठाउँका लागि फरक नाम प्रयोग गर्ने गरेको छ। जस्तै, साउदी अरब र इरानबीचको खाडीको नामलाई लिएर दशकौँदेखि विवाद छ।

अन्तर्राष्ट्रिय प्रयोगकर्ताहरूका लागि गुगलले सो खाडीलाई ‘पर्सियन गल्फ (अरबियन गल्फ)’ भनेर लेख्छ। तर खाडी नजिकका अरब देशहरूमा गुगल म्याप्सले यसलाई अरबियन गल्फ नै भनेर देखाउँछ।