कति नोट थिए?

प्रहरीको प्रश्नमा उनीहरुले जवाफ थियो - ४३ वटा।

तर, प्रहरीले शरीर खानतलासी गर्दा ३१ वटामात्र फेला पार्‍यो।

महानगरीय प्रहरी वृत्त कालीमाटीको टोलीले दुई जनालाई नक्कली नोटसहित पक्राउ गरेको थियो। बारा निजगढका २७ वर्षीय अनुस थापा मगर र २२ वर्षीय रवि आले मगर विशेष सूचनाको आधारमा पक्राउ परेका थिए। प्रहरीले काठमाडौं महानगरपालिका-१४ कलंकी चोकबाट आइतवार उनीहरुलाई नियन्त्रणमा लिएको हो।

उनीहरुको साथबाट प्रहरीले एक हजार दरका ३१ वटा नोट फेला पारेको हो। ४३ वटा नोटमध्ये बाँकी १२ वटा हजारका नोट कहाँ गयो त?

सुरुमा प्रहरीलाई जवाफ दिएनन् उनीहरुले। तर, पछि भने नखुली सुख पाएनन्। उनीहरुको जवाफ थियो - रेष्टुरेष्टमा खर्च भयो?

कहाँको रेष्टुरेष्ट? प्रहरीले फेरी प्रश्न तेर्साए।

ठमेल।

प्रहरीले नियन्त्रणमा लिएका उनीहरुले नक्कली नोटलाई सक्कली सरह रेस्टुरेन्टमा खर्चिएका रहेछन्। यसको मतलब उनीहरुबाट रेस्टुरेन्टले लिएको रकम तपाई हाम्रो खल्तीमा नआउला भन्न सकिँदैन।

शतर्क!

त्यसो त प्रहरीको अनुसन्धानमा उनीहरुले नक्कली नोट ट्याक्सीवालालाई समेत दिएको खुल्छ।