विवेक विवश रेग्मी

‘कोरोना संक्रमण फैलिएको जिल्लाबाट ल्याइएको भन्दै गर्भवती महिलालाई अप्रेसन थियटरबाटै निकालियो’, ‘विरामीको भर्ना गर्न नमान्दा एकजनाको निधन’, ‘अस्पताल वरिपरि घुमाउँदा–घुमाउँदै मृत्यु’, ‘स्वास्थ्यमन्त्रीलाई विरामीको पत्र- अब त बाँच्छु जस्तो छैन ।’

विभिन्न पत्र–पत्रिका र अनलाई पोर्टलहरुमा एकै दिनको फरकमा आएका समाचारका शीर्षक हुन् माथि लेखिएका शब्द। अहिले कोरोना भाइरसको संकटका कारण विभिन्न अस्पतालहरुले विरामी भर्ना गर्न नमान्नु र उपचार गर्न नमान्ने समाचारहरु निरन्तर बाहिरिरहेका छन् ।

सरकारले लकडाउन घोषणा गरेसँगै देशैभरिका विभिन्न निजी अस्पतालहरु बन्द छन् भने केही अस्पतालहरु खुल्ला रहेका छन् । प्रदेश १ मा सुनसरीको धरानस्थित वीपी कोइराला स्वास्थ्य विज्ञान प्रतिष्ठान र मोरङमा कोसी अस्पतालमा प्रदेश सरकारले कोरोना अस्पताल खडा गरी विरामीको उपचार गर्दै आएको छ । तर, विराटनगरका अन्य अस्पतालहरुले भने विरामीलाई भर्ना नै गर्न नमान्दा विरामीको एम्बुलेन्समै मृत्यु हुने, अप्रेसन थियटरबाटै रेफर गरिने जस्ता कुराहरु बाहिर आइरहँदा प्रदेश सरकार, स्थानीय सरकार र संघीय सरकारले चासो देखाएको पाईँदैन । न यस बिषयमा अस्पताल सञ्चालकहरु नै गम्भीर भएको पाइन्छ ।