इंग्लिस प्रिमियर लिग क्लबहरुले यो हप्ता आफ्ना खेलाडीहरुलाई सानो समूह बनाएर प्रशिक्षण गर्न स्वीकृति दिने भएकाे छ। अहिलेसम्म खेलाडीले एक्लै प्रशिक्षण गरिरहेका छन्।

कोरोना भाइरसको महामारीका कारण गएको मार्च १३ देखि रोकिएको लिगका खेलहरु पुनः सुरु गर्ने सम्बन्धमा भने क्लबहरु अझै एकमत हुन सकेका छैनन्।

न्यूट्रल भेन्यूमा बाँकी ९२ खेल गर्ने तयारी थालिए पनि सबै क्लब त्यसमा सहमत देखिएका छैनन्। सोमबार लिगका २० क्लबबिच छलफल हुँदैछ। सो छलफलमा प्रशिक्षण तथा मेडिकल प्रोटोकललाई लिएर मतदान हुनेछ।

मतदानमा प्रस्ताव पारित भएमा मंगलबारदेखि खेलाडीहरु पाँचजनाको समूह बनाएर प्रशिक्षण गर्न पाउने छन्। प्रस्ताव पारित हुन लिगका २० मध्ये १४ क्लब सहमति हुनु पर्छ।

गएको हप्ता बेलायत सरकारले क्लबहरुले प्रशिक्षण व्यक्तिगत रुपमा सुरु गर्न पाउने गरी मार्ग खुला गरेको थियो। तर बन्द रंगशालामा खेल हुनका लागि अझै धेरै समय लाग्ने देखिएको छ।