परराष्ट्रमन्त्री प्रदीपकुमार ज्ञवालीले दलित समुदायमाथि छुवाछुतजन्य विभेद र हिंसाका घटना भइरहनुलाई संघीय लोकतान्त्रिक गणतन्त्रका लागि नै चुनौति भएको  बताएका छन्।

मन्त्री ज्ञवालीले बुधबार छुवाछुतविरुद्धको राष्ट्रिय दिवसको अवसरमा ट्विटरमा उक्त कुरा लेखेका हुन्।  उनले रुकुमको सोतीमा भएको हत्या घटनाले सामाजिक संरचना नै खोटपूर्ण देखाएको बताए।

‘हालै रुकुममा घटित विभत्स घटनाले हाम्रो सामाजिक संरचनामा निहित गम्भीर खोटहरू उजागर गरेको छ,’उनले लेखेका छन्,‘राजनीतिक रुपमा उच्च रहेको हाम्रो परिवर्तनको सामाजिक–सांस्कृतिक धरातल कमजोर छ भन्ने स्पष्ट पारेको छ।’

जेठ १० गते रुकुमको सोतीमा जाजरकोटका नवराज विकसहित ६ जनाको हत्याको भएको थियो।

छुवाछुत जस्तो मानवतामाथिको कलंकलाई कानूनी रुपमा मात्रै होइन व्यवहारमै निर्मूल गर्न पनि उनले आव्हान गरेका छन्।