केवल तिनै इतिहासकारलाई अतीतबाट आशाका ज्वाला भड्काउने वरदान प्राप्त हुन्छ, जो पूरै तरिकाले सजग हुन्छन् कि दुस्मनले यदि जित्यो भने त्यसमा हाम्रा मारिएका मान्छेहरू पनि सुरक्षित बच्ने छैनन् र दुस्मनले अझै चढाइ अभियान रोकेकै छैन । –वाल्टर बेन्जामिन
भूमिका र अवस्थासँगै उनले आफ्नो नाम फेर्दै गए । तर, विश्वास भत्किए, तोडिए, भाँच्चिए र च्यातिए पनि हामीले उनलाई ‘विश्वास’ दाइ भन्दै गयौँ । विगत २५ वर्षदेखि नेपाली राजनीतिको बहसको केन्द्रमा रहेका ‘प्रचण्ड’ पछिल्लो १६ वर्षदेखि संसदीय राजनीतिको ‘किङमेकर’ खेलाडी बने । ‘विश्वास’, ‘निर्माण’हुँदै प्रचण्ड बनेका पुष्पकमल दाहाललाई अहिले प्रचण्ड र दाहालको रिमिक्स गराउने चुनौती पछिल्लो अदालत प्रकरणसँगै थपिएको छ । केपी ओलीले जस्तै उत्तराधिकारी जन्माउन भने उनले सकेनन् । केपीको उत्तराधिकारी बनेर विद्या भण्डारी आउने भइन् तर प्रचण्डको उत्तराधिकारी को ?
