क्यानडाविरुद्धको एकदिवसीय अन्तर्राष्ट्रिय सिरिजमा नेपालले क्लिन स्वीप गरेको छ।
सोमबार कीर्तिपुरस्थित त्रिवि अन्तर्राष्ट्रिय क्रिकेट मैदानमा सम्पन्न खेलमा नेपालले क्यानडालाई ९ विकेटले पराजित गर्दै ३ खेलको सिरिज क्लिन स्वीप गरेको हो।
क्यानडाले दिएको २३३ रनको लक्ष्य पछ्याएको नेपालले ४४.३ ओभरमा एक विकेट गुमाउँदै लक्ष्य पूरा गरेको थियो।
नेपालका लागि अनिल शाह र भीम सार्की शतकीय पारी खेलेका थिए। अनिलले अविजित ११२ र भीमले अविजित १०१ रन बनाएका थिए। अनिल र भीमले दोस्रो विकेटका लागि १८९ रनको साझेदारी गरेका थिए।
यो साझेदारी नेपालको एकदिवसीय इतिहासमा कुनै पनि विकेटका लागि अहिलेसम्मको ठुलो साझेदारी हो। यस अघि कुशल भुर्तेल र आसिफ सेखले जिम्बाबेविरुद्ध पहिलो विकेटका लागि १७१ रनको साझेदारी गरेका थिए।
यस अघि टस हारेर पहिला ब्याटिंग गरेको क्यानडाले ५० ओभरमा ८ विकेट गुमाएर २३२ रन बनाएको थियो।
क्यानडाका लागि नवनीत धलिवालले सर्बाधिक ५० रन बनाएका थिए भने निखिल दत्ताले ४५ रन बनाए। त्यसैगरी हर्ष ठकेरले २९, श्रेयस मोभ्भाले २५, श्रीमान्थ विजेयेरात्नेले २२ तथा साद बिन जफारले अविजित ३१ रन बनाएका थिए।
त्यसैगरी नेपाली बलर हेमन्त धामीले आफ्नो डेभ्यु खेलमा ३ विकेट लिएका थिए। त्यस्तै कुशल मल्लले २ तथा ललित राजबंशी र आकाश चन्दले एक एक विकेट लिएका थिए। योसँगै नेपालले सिरिज ३-० ले जितेको छ।
