अमेरिकामा अध्ययनरत् नेपाली विद्यार्थीको संख्या ओरालो लाग्ने क्रम सुरू भएको छ । अमेरिकी सरकारले जारी गरेको जनवरी महिनाको सेभिस तथ्यांकअनुसार पछिल्लो एक महिनाममै  सात सय १७ नेपाली विद्यार्थीको संख्या घटेर यतिबेला यो संख्या ३३ हजार सात सय ३५ मा सिमीत भएको छ । यो संख्यामा छात्र १८ हजार नौसय दुई र छात्रा १४ हजार आठसय ३३ रहेका छन् । 

नेपाली विद्यार्थीहरूको संख्या ब्याचलर र एशोसियट तहमा घटेको हो । तथ्यांकअनुसार व्याचलर तहमा ६११ र एशोसियट तहमा २३३  नेपाली विद्यार्थी घटेका छन् । तर, यही अवधिमा माथिल्लो तहमा अध्ययनरत नेपाली विद्यार्थीको संख्या भने बढेको छ । डक्टरेट तहमा अध्ययनरत नेपाली विद्यार्थीको संख्या ७४ ले बढेर ९,९१९ पुगेको छ भने डक्टरेट तहमा अध्ययनरत नेपाली विद्यार्थीको संख्या  ९५ ले बढेर  ४,३३५ पुगेको छ। यसैगरी भाषा तालिममा अध्ययनरत नेपाली विद्यार्थीको संख्या ३७ ले बढेर २७६ पुगेको छ भने फ्लाइट स्कूलमा अध्ययनरत नेपाली विद्यार्थीको संख्या २ ले बढेर  ५३ पुगेको छ।

नेपाली विद्यार्थीको ठूलो संख्या रहेको अमेरिकाका पाँच राज्यमा टेक्सास, ओहायो, न्युयोर्क, मिजौरी र केन्टकी हुन् । २०२६ जनवरीको सेभिस तथ्यांकअनुसार टेक्सासमा सातहजार सातसय ५८, ओहायोमा दुईहजार चारसय २२, न्युयोर्कमा  दुईहजार दुईसय, मिजौरीमा एकहजार चारसय ६७  र केन्टकीमा एकहजार छसय ४७ जना नेपाली विद्यार्थी रहेका छन् । 

अमेरिकी राष्ट्रपति ट्रम्पको विदेशी विद्यार्थीहरूप्रतिको नकरात्मक सोचका कारण अमेरिकामा अध्ययनरत् विदेशी विद्यार्थीहरूको संख्यामा उल्लेखनीय मात्रामा कमी आएको छ । त्यसको प्रत्यक्ष प्रभाव नेपाली विद्यार्थीहरूको संख्यामा पनि परेको छ । ट्रम्प प्रशासनको कठोर अध्यागमन नीतिको शिकार भएर ठूलो संख्यामा विदेशी विद्यार्थीहरू पनि डिपोर्ट गरिएका छन् । त्यो संख्यामा नेपाली विद्यार्थीको संख्या पनि उल्लेख्य रहेको छ ।