गतिशील लोकतान्त्रिक पार्टी (गलोपा)ले सामाजिक अभियन्ता गीता केसी दर्नाललाई समानुपातिक बन्दसूचीमा समावेश गरेको छ।

आगामी फागुन २१ गते हुने प्रतिनिधिसभा निर्वाचनका लागि समानुपातिक बन्दसूची बुझाएसँगै दलहरू आलोचनाले घेरिएका बेला गलोपा भने उत्कृष्ट ११ जनाको मात्रै नाम सिफारिस गरेर प्रशंसा पाइरहेको छ।

पार्टीका अनुसार आदिवासी जनजाति, दलित, महिला र अल्पसङ्ख्यक समुदायलाई प्राथमिकता दिएर सूची तयार गरिएको हो। त्यसैमा दलित महिलातर्फबाट गीता केसी दर्नाल सिफारिस भएकी हुन्।

पार्टी अध्यक्ष दिनेश प्रसाईंले भने, ‘हाम्रो सूचीमा सेलेब्रिटीहरू छैनन्, समाजमा संघर्ष गरेका आम नागरिकलाई स्थान दिएका छौं।’

अभियन्ता दर्नाल साझा सहयात्री नामको संस्थामार्फत ऋणपान र गहना बेचेर यौन हिंसामा परेका बालिकाहरू पालिरहेकी छिन्। सुरूमा ९ जना बालिका राखेर सुरू गरेको उनको संस्थामा अहिले दर्जन बढी बालिका छन्।

उनले बलात्कार, यौन हिंसामा परेका बालिकाहरूलाई फेरि बाँच्न सिकाइरहेकी छन्। उनी बालिकाहरूलाई खाना, लुगाफाटा, विद्यालय, उपचार, माया र आत्मसम्मान दिन्छिन्।