सरकारले ताप्लेजुङको पाथीभरा क्षेत्रमा केवलकार निर्माणको क्रममा उत्पन्न विवाद समाधानका लागि वार्ता टोली गठन गरेको छ।

गृह मन्त्रालयले आइतबार राति विज्ञप्ति जारी गर्दै आन्दोलनरत पक्षहरूसँग वार्ता गर्न गृह मन्त्रालयका सहसचिव प्रेमप्रसाद भट्टराईको संयोजकत्वमा वार्ता टोली गठन गरेको जानकारी दिएको हो।

सरकारले वार्ता र संवादको माध्यमबाट समस्या समाधान गर्ने भन्दै सहसचिव भट्टराईको संयोजकत्वमा संघीय मामिला तथा सामान्य प्रशासन मन्त्रालय, संस्कृति, पर्यटन तथा नागरिक उड्डयन मन्त्रालय र सहरी विकास मन्त्रालयका प्रतिनिधिसमेत रहेको वार्ता टोली गठन गरिएको जनाएको छ।

गृह मन्त्रालयका सहसचिव एवम् प्रवक्ता रामचन्द्र तिवारीका अनुसार वार्ता टोलीले तत्काल कार्य प्रारम्भ गर्ने र आन्दोलनरत पक्षलाईसमेत आन्दोलनका कार्यक्रमहरू फिर्ता लिई संवादमार्फत् समस्या समाधानमा सहयोग गर्न मन्त्रालयले अपिल गरेको छ।