नेपाली कांग्रेस प्युठानले एमाले नेता तथा प्रतिनिधि सभा सदस्य सूर्य थापाका पछिल्ला व्यवहार र गतिविधिप्रति गम्भीर ध्यानाकर्षण भएको जनाएको छ।

कांग्रेस प्युठान सभापति विष्णु गिरीले एक विज्ञप्ति जारी गर्दै सांसद थापाले अनपेक्षित जितको उन्मादमा फरक विचार राख्ने व्यक्ति र जनप्रतिनिधिलाई पदीय मर्यादाविपरीत अस्वाभाविक चरित्र देखाउने र बहुपार्टी सिद्धान्तलाई अनदेखा गरी  निरन्तर असमावेशी स्वभाव देखाएको आरोप लगाएका छन्।

सांसद थापाले समानुपातिक सांसदलाई लक्षित गर्दै ‘यी समानुपातिकहरूलाई फुर्सदै फुर्सद छ। समानुपातिकलाई न कसैले गुनासो गर्छन् न कुनै जिम्मेवारी छ। न कुनै चुनाव जितेको अनुभव छ’ भन्दै समावेसी मान्यतामाथि आक्रमण गरेको कांग्रेसको ठहर छ।

त्यस्तै उनले समानुपातिक सांसदहरू नागरिकको घरदैलोमा पुगेको विषयलाई ‘क्याटवाक गर्दै हिँडेर विकास हुन्छ र?’ भन्ने जस्ता आधारहीन र गलत टिप्पणी गर्दै हिँडेको भन्दै कांग्रेसले यस्ता अभिव्यक्ति नदिन चेतावनीसमेत दिएको छ।

सांसद थापाले समानुपातिक सांसद निमा गिरीसँग संयुक्त संयुक्त उद्घाटन गर्ने भनि लेखिएको ब्यानर टाँस्न नदिने, कर्मचारीलाई थर्काउने र सरुवाको धम्की दिनेजस्ता अलोकतान्त्रिक चरित्र देखाई घृणा फैलाउने (हेट स्पीच) कार्य गरेको भन्दै कांग्रेसले आपत्ति जनाएको छ।