बेलायतमा रहेका दुई नेपालीका लागि घरपछाडि लगेर सुँगुर काट्नु महंगो सावित भएको छ । 

विल्टसायरको पेनहिलस्थित घरपछाडिको बगैचामा दुईवटा संगुर काटेबापत उनीहरूले १६१० बेलायती पाउण्ड जरिवाना तिर्नु परेको छ । 

यस्तो सजाय पाउने नेपालीको नाम केशर राना र आशिष लिम्बु रहेको स्विन्डन बरो काउन्सिलले जनाएको छ । 

सुँगुर काटेको उजुरी छिमेकबाट पाएपछि बरोका वातावरणीय स्वास्थ्य अधिकारी त्यहाँ पुग्दा दुईवटा सिंगै सुंगुर भेटिएको थियो । एक स्वास्थ्य अधिकारीका अनुसार एउटा सुंगुर झिंगा भन्किएको अवस्थामा भेटिएको थियो ।

सुरूमा त राना र लिम्बूले सजायबाट बच्न सकिन्छ कि भनेर वेल्सको फार्मबाट सुँगुर काटेर ल्याएको बताएका थिए । तर, स्वास्थ्य अधिकारीहरूले उनीहरूको कुरामा विश्वास गरेनन् र सुँगुरको पोष्टमर्टम नै गरे ।

यसरी पोष्टमर्टम नै गरेपछि भने उनीहरूले मिडस्टोनमा आयोजना हुन लागेको एउटा भोजका लागि सुंगुर काटेको स्वीकारेका थिए । 

बेलायत बधशालामा बाहेक अन्य स्थानमा जीवजन्तु काटमार गर्न निषेध छ । उनीहरूले त्यही कानुनको उलंघन गरेकाले महंगो जरिवाना तिर्नुपरेको हो । 

यसैबीच यो घटनालाई लिएर स्थानीयबासीले बरोको आधिकारिक फेसबुक पेजमा रोष पनि प्रकट गरेका छन् । उनीहरूको यो कार्यबाट नेपाली समाजलाई हेर्ने दृष्टिकोण नै नकारात्मक बनेको फेसबुक पेजका प्रतिक्रियाबाट सजिलै अनुमान गर्न सकिन्छ ।