सरकारले वि.सं. २०५६ सालमा हवाई विभाग विघटन गरी एक स्वायत्त संस्थाका रूपमा नेपाल नागरिक उडड्यन प्राधिकरण स्थापना गरेको थियो। प्राधिकरण स्थापनाको २० वर्षपश्चात नेपाल सरकारले पुनः यो संस्था विभाजन गरी दुईवटा स्वायत्त संस्था स्थापना गर्ने गृहकार्य अघि बढाएको छ। केही दिनअघि प्राधिकरणको २१ औँवार्षिकोत्सवको उपलक्ष्यमा आयोजित कार्यक्रममा नेपाल नागरिक उडड्यन प्राधिकरलाई नियमनकारी निकाय र सेवाप्रदायक निकायका रूपमा विभाजन गर्ने विषयमा व्यवस्थापन पक्ष र कर्मचारीको आधिकारिक युनियनबीच चर्को विवाद भएको विषय सतहमा आएको छ। कर्मचारीले प्राधिकरणको विभाजनलाई लिएर विमति राख्दै आएका विषयले प्राधिकरणको हालको अवस्था, विभाजनपछिका अवस्था र त्यसबाट कर्मचारीको सेवा/सुविधा एवं वृत्ति विकासमा पर्न सक्ने संभावित असर र प्राधिकरणको सेवा, प्रवाहमा पर्न सक्ने असरदेखिन्छ।
नेपालमा नागरिक उडड्यनको क्षेत्रमा सेवा प्रवाह गर्ने विभिन्न सेवाप्रदायक संस्थाको नियमन गर्ने निकायका रूपमा नेपाल नागरिक उडड्न प्राधिकरण स्थापना हुँदा नियमन निकायकासाथै एयर नेभिगेसन सेवा, विमानस्थल सञ्चालन र उडड्यन एकेडेमी जस्ता सेवा प्रवाह गर्ने संस्था पनि प्राधिकरणको संगठन छाताभित्रै रहे। स्थापनाको लामो समयसम्म पनि भौतिक पूर्वाधार विकास, विमानस्थल सञ्चालन एवम् सेवा प्रवाहको कार्यले संगठनमा बढी प्राथमिकता पाउँदा नियमनको क्षेत्र कमजोर अवस्थामा रह्यो ।त्यसमा पनि प्राधिकरणकोे आफ्नै सेवा प्रवाह कार्यको नियमन अझ निष्प्रभावी रहनु स्वाभाविकै थियो।
