चीनमा कोरोना भाइरस संक्रमणले महामारी रूप लिएपछि 'फेस मास्क' को माग बढेको छ। चीनसहित दक्षिण तथा पूर्वी एसियाली मुलुकमा मान्छे मास्कले नाक–मुख ढाकेर हिँडेका दृश्य प्रशस्त देखिन्छन्। विश्व स्वास्थ्य संगठनका अनुसार पछिल्लो समय सामान्य मास्कको माग सय गुणा र मूल्य २० प्रतिशत बढेको छ।

स्वास्थ्य विशेषज्ञहरू मास्कले अनुहार ढाकेर मात्र भाइरस संक्रमणबाट सुरक्षित नहुने बताउँछन्। उनीहरूका अनुसार पटक–पटक राम्ररी हात धुनु भाइरसबाट बच्ने उत्तम उपाय हो।

धेरैलाई स्वास्थ्य विशेषज्ञहरूको यो भनाइ थाहा नभएको होइन। तै पनि अनुहार ढाकेर हिँड्नबाट उनीहरू आफूलाई रोक्न सक्दैनन्। चाहे त्यो कोरोना भाइरसजस्तो महामारी बेला होस्, वा सहरमा प्रदूषण बढेका बेला।

हामीले मास्कको ऐतिहासिक र सांस्कृतिक सन्दर्भ हेर्ने हो भने, चिनियाँहरू यसलाई भाइरस संक्रमणबाट सुरक्षित हुने उपायभन्दा बेसी नै मान्छन्। उनीहरूका निम्ति यो स्वास्थ्य सेवासँग जोडिएको आधुनिकताको प्रतीक हो।