विदेशी एयरलाइन्सबाट काठमाडौं आएका यात्रुमा धमाधम कोरोना भाइरस सङ्क्रमण धमाधम पुष्टि हुन थालेपछि प्रहरीले विदेशबाट आएकाको खोजी सुरु गरेको छ ।

सरकारले सूचना जारी गरी सम्पर्कमा आउन आग्रह गर्दा पनि हालसम्म सम्पर्कमा नआएका १३६ जनाको प्रहरीले खोजी थालेकाे हो । 

नेपाल प्रहरीका प्रवक्ता एसएसपी उमेशराज जोशीका अनुसार, कतारकाे दाेहाबाट कतार एयरवेज चढी आएका १८ जना, युएईको सारजाहबाट एयर अरेवियाको विमान चढेर आएका ३९ र भारतको राजधानी नयाँ दिल्लीबाट भिस्टारा एयरलाइन्सको विमानबाट आएका ७९ जना अझै सम्पर्कमा आएका छैनन् । उनीहरुलाई पक्राउ गर्ने तयारी गरेकाे छ ।

प्रवक्ता जोशीले भने, ‘सम्पर्कमा नआएकाहरुलाई प्रहरीको केन्द्रीय हेल्थ डेक्सले देशभरि खोजी थालेको छ । अद्यागमनमा पनि उनीहरुको पूरा ठेगाना रहेनछ । त्यसैले खोजी गर्न समय लागेको हो । प्रहरीले पत्ता लगाउँछ ।’ 

उनले कोरोना भाइरस संक्रामक रोग भएकाले अरुमा फैलिएमा भयावह परिस्थिति आउन सक्ने हुनाले सचेत हुन आग्रह गर्दै भने, 'आफैँ सम्पर्कमा आएर क्वारेन्टाइनमा बस्न म अनुराेध गर्छु ।' 

कतार एयरको चैत ४ गतेको उडानबाट काठमाडौं आएकामध्ये १४० जना सम्पर्कमा छन् । तीमध्ये तीन जनामा कोरोना पुष्टि भएको छ । उक्त विमानमा जम्मा १५८ जना यात्रु आएका थिए । १८ जनाको प्रहरीले खोजी गरिएको हो । 

उक्त दिन कतारको दोहाबाट काठमाडौं आएको कतार एयरवेजको क्युआर–६५२ नम्बरको उडानबाट नेपाल आएका तीन जनामा कोरोना भाइरस संक्रमण पुष्टि भएपछि बाँकी खोजी तीव्र गरिएको छ । 

त्यसैगरी एयर अरेबियाबाट आएका १७० यात्रु थिए । तीमध्ये १३१ जना सम्पर्कमा छन् । बाँकीको खोजी भइरहेको छ । उक्त विमान युएईको सारजाहबाट आएको थियो । 

दिल्लीबाट काठमाडौं आएको भिस्टारा विमानका १३० जनामध्ये  ५१ सम्पर्कमा आएका छन् भने अरु सम्पर्कमा छैनन् ।