टुना भट्ट

कोरोनाभाइरसको महामारीले सिर्जित हालको अवस्थाबाट नपिरोलिने सायदै कमै होलान् । कोरोनाको महामारी नियन्त्रण तथा रोकथामका लागि लकडाउन भएसँगै मानिसको दैनिकीमा परिवर्तन भए । यो परिवर्तनले मानिसमा शारिरिक र मानसिक दुवै खालका असर पारिरहेको छ । हरेक मानिसको मन मनमा डेरा जमाएको कोरोनाले लामो समयसम्म छुटकारा नदिने पक्का पक्की छ । त्यसैले यस्ता असरबाट बच्न सजगता अपनाउनुपर्ने मनोविद्हरुको सुझाव छ ।

कोरानाकै कारण विश्व नै यतिवेला डर र त्रासमा छ । यही डरले विश्वव्यापी रुपमा मानसिक समस्या पनि बढ्दै गएको छ । दैनिक ज्यालामजदुरी गरेर पेट पाल्नुपर्नेहरुलाई लकडाउनका कारण जीवनयापनको समस्या छ भने अर्कोतिर रोजगारी गुमेका र उद्योग व्यवसाय बन्द हुँदा ठूलो क्षतीको सामना गर्न बाध्य उद्योगी व्यवसायीमा पनि ऋणको बोझबाट कसरी बाहिर आउने भन्ने चिन्ताले थिचेको देखिन्छ ।