४५०० मिटर उचाइमा रहेको सीमा नाकामा सशस्त्रको गस्ती {तस्बिरहरू}

चीनसंग सीमा जोडिएको हिमाली जिल्ला मुस्ताङको लोमान्थाङ गाउँपालिका–१ नेचुङमा सशस्त्र प्रहरी बलले नियमित गस्ती थालेको छ।

बिहिबार बिओपीको उद्घाटन भएपछि कोरला नाकाको ४५०० मिटर उचाइमा सशस्त्रले नियमित गस्ती सुरू गरेको हो।

बिओपीमा सशस्त्र प्रहरी निरीक्षक डम्बर बहादुर श्रेष्ठको नेतृत्वमा २० सशस्त्र प्रहरीको टोली खटिएका छन्। स्थायी पूर्वाधार तयार नहुँदासम्म सशस्त्र प्रहरीको टोली नेचुङ भन्सार कार्यालयको भवनमा बस्नेछन्। बिओपीको भवन निर्माणका लागि ३३ रोपनी जग्गा व्यवस्थापन गरेर आवश्यक बजेटसमेत विनियोजन भइसकेको छ ।

कोरला नाकाको दशगजा नजिकै नेपालतर्फ भन्सार र क्वारेन्टिन भवन निर्माणका लागि एक हजार रोपनी जग्गाको व्यवस्थापनसमेत भएको प्रतिनिधिसभा सदस्य प्रेमप्रसाद तुलाचनले जानकारी दिए। उनले यसै आवमा भन्सार कार्यालय पनि बनाइने बताए।

मुस्ताङका प्रमुख जिल्ला अधिकारी वेदप्रसाद अर्यालले बिओपी स्थापनासँगै सीमा सुरक्षा, सम्भावित चोरी तस्करी नियन्त्रण, भन्सार गस्ती र विपद् व्यवस्थापनमा सहयोग पुग्ने विश्वास व्यक्त गरेका छन्।

कोरला नाका जोड्ने १८६ किलोमिटर दूरीको बेनी–जोमसोम–कोरला सडक स्तरोन्नतिका लागि २०७३ देखि ११ प्याकेजमा आयोजना सञ्चालन भएको छ। सडक विस्तार, कालोपत्र र मोटरेबल पुल निर्माणको काम भइरहेको छ । ११ प्याकेजमध्ये १८ किलोमिटर दूरीको छोसेर–कोरला र जोमसोम–छुसाङ खण्डको सडक स्तरोन्नतिको काम मात्र सकिएको छ ।

हेर्नुहोस् तस्बिरमा

तस्बिरः रासस

तस्बिरः रासस

प्रकाशित मिति: May 31, 2020 17:19:19

प्रतिक्रिया दिनुहोस