दिपा दाहाल

कोरोना महामारीको प्रभाव र पीडाबाट कोही पनि अछुतो छैन। महामारीले प्राय: सबैको मनोबल कमजोर बनाएको छ। आर्थिक संकट आइलागेको छ।

भविष्य अनिश्चत बनेको छ। राज्यबाट उपेक्षित, गरिब, मजदुर मात्रै होइन बिरामीको उपचार र परीक्षणमा अहोरात्र खटिने चिकित्सक, स्वास्थ्यकर्मी, प्रयोगशाला प्राविधिकहरु र सुरक्षामा समेत खटिनेहरु यो महामारीबाट पीडित र प्रभावित छन्।

संक्रमण हुनासाथ उनीहरु पनि एकाएक अत्तालिएको पाइन्छ। त्यो स्वाभाविक पनि हो। कारण कोरोनाले विश्वभरि लाखौँको ज्यान लिइसकेको छ। र, यसविरुद्धको औषधि (खोप) अझै पत्ता लागेको छैन । संक्रमणबाट नेपालमै २९ जनाले मृत्युवरण गरेका छन्।

संक्रमण पुष्टि हुनासाथ कुनै पनि व्यक्ति प्रायः पारिवारिक र सामाजिक तिरस्कारको पात्र बनेको पाइन्छ। घरधनीले निकाल्ने या डेरा नदिने प्रवृति व्याप्त बनेको छ। जसले गर्दा उपचार पछि निको भएकाहरुलाई पनि मानसिक रुपमा पूर्ववत् अवस्थामा फकिर्न गाह्रो हुनेगरेको छ।