तत्कालीन राजप्रासाद सेवाका पूर्व प्रमुखसचिव रेवतीरमण खनालको निधन भएको छ।
कानून क्षेत्रका ज्ञाता एवं साहित्यकार खनालको मंगलबार साँझ ८८ वर्षको उमेरमा काठमाडौं महानगरपालिका १३ कालीमाटीस्थित निवासमा निधन भएको हाे।
उनी मधुमेह र दमको बिरामी थिए।
मदन पुरस्कारसमेत प्राप्त खनालले ‘मुलुकी ऐन केही विवेचना’, ‘कर सम्बन्धी कानून’, ‘नेपालको कानूनी इतिहासको रुपरेखा’, ‘रिट निवेदन सिद्धान्त र विवेचना’, ‘विश्वका प्रमुख कानून प्रणाली’, ‘नेपालको कानूनी मस्यौदा’, तथा ‘समालोचना र फैसला’ लगायत पाठ्यपुस्तक लेखेका छन्।
तनहुँमा जन्मिएका खनालले ३५ वर्ष राजप्रासाद सेवामा काम गरेका थिए। उमेर हदका कारण उनले वि.सं. ०५२ सालमा प्रमुख सचिव पदबाट अवकास पाएका थिए।
खनाल नेपालको संवैधानिक कानूनका विज्ञ मानिन्छन्।
उनका श्रीमती, दुई छोरा र एक छोरी छन्। विदेशमा रहेका छोरा नेपाल आएपछि उनकै पूर्व इच्छाअनुसार तनहुँको देवघाटमा खनालको अन्त्येष्टि गरिनेछ।
