चेतना दोङ तामाङ, वर्ष २०। मित्र दोङ र च्याङ्बा कुमारी लोप्चनकी जेठी छोरी। उनको जन्म रामेछापको सुनापति गाउँपालिका ४ मा भएको थियो।

एक बहिनी र भाईकी दिदी चेतनाको सपना छ, वकिल बनेर अन्यायविरूद्ध लड्ने। 

तर, घरको कमजोर आर्थिक अवस्थाका कारण उनी दश जोड दुई कक्षाको पढाईं पुरा गरेर बसेकी छिन्। बुवा थान्का बनाउँछन्।

 आमा छोरा–छोरीको उज्जवल भविस्यका लागि २०७० सालमै विदेश पलायन भएकी थिइन।

हाल उनी ओमानमा बसेर काम गरिरहेकी छिन्। 

घर खर्च जुटाउन आमा ८ कक्षा पढ्दा पढ्दै विदेश पलायन भएपछि जेठी छोरी हुनुको कर्तब्य निभाउन विवश थिइन् उनी। 

स्कुल पढ्दा पनि उनी घरको सारा काम सकेर भ्याईनभ्याई कक्षा कोठामा पुग्ने गर्थिन। पढाईमा अब्बल उनले गाउँकै श्री डहु माध्यमिक विद्यालयबाट कक्षा दशको पढाई पुरा गरिन्। 
 
‘प्लस टु’ को अध्ययन भने उनले राजधानी काठमाडौंस्थित बालाजुमा रहेको फुपुको घरमा बसेर पुरा गरिन्। २०७३ सालमा उनी राजधानी आएकी हुन्। 

उनले गीतामाता माध्यमिक विधालयबाट छात्रबृत्तिमा पढ्ने अवसर प्राप्त गरेकी थिइन्। 

आर्थिक अवस्था कमजोर भएकै कारण उनले कलेज पढ्दै गर्दा प्रिसेस नेशनल एकेडेमीमा कक्षा ३–५ सम्मका विद्यार्थीलाई पढाउने काम गर्न थालिन्। जसले गर्दा काठमाडौंमा बसोबास गर्ने अवसर प्राप्त भयो। 

पहिले त उनलाई पढाउन सक्दिन कि जस्तो लागेको थियो। तर, परिस्थितिले सबै गर्न सिकाउँछ भन्छन् नि, यस्तै भयो उनको हकमा पनि।

‘कक्षामा जान्ने विधार्थी भएकै कारण कामको अफर आएको थियो,’ चेतनाले बिएल नेपाली सेवासँग भनिन्।
 
तर, पढाउने काममा व्यस्त हुँदा उनको अध्ययनमा असर पर्न थाल्यो। पहिले प्रथम हुन्थिन्, पछि दोस्रो हुँदै तेस्रोमा नाम निस्किन थाल्यो। 

आफ्नो अध्ययनमा असर परेको अनुभव गरेपछि उनले ६ महिनापछि टिचर पेशालाई विश्राम दिएकी थिइन्।
 
२०७४ सालमा उच्च माध्यमिक तहको परिक्षा पास गरेपछि उनले आफ्नो सपना पूरा गर्न बीएएलएलबीको तयारी गरिन्। 

यसका लागि उनी आफूले अध्यापन गराउने बालाजुस्थित स्कुलबाट दैनिकी नयाँ बानेश्वर धाउँथिन्। 

पढाई र खर्चबीचको तारतम्यता मिलाउन निकै गाह्रो भएपछि उनले केही समय अध्ययनबाट पनि विश्राम लिएकी थिइन्। 

तर, पुनः आफ्नो सपना पुरा गर्न उनले जागिर हापेकी छिन्। विगत २ वर्षदेखि उनी 'कल सेन्टर' मा कार्यरत थिइन्। उनले हप्ता दिन अघि मात्रै जागिर छाडेकी हुन्। 

भन्छिन्, ‘जागिरका कारण पढाईमा असर पर्‍यो। यसले मेरो सपनालाई पनि टाढा ढकेल्दै लगिरहेको छ। यसैले मैले हालै कामबाट राजीनामा गरेको छु।’

१५ वर्ष रामेछापको सुनापति गाउँपालिकाको ग्रामिण भेगमा हुर्किएकी चेतना एउटा असल अधिवक्ता बनेर समाजमा विधमान असमानता हटाउने अभियानमा होम्मिन चाहन्छिन्। 

हेरौं, उनी आफ्नो अभियानमा सफल हुन्छिन कि हुन्न? तर, उनलाई हाम्रो तर्फबाट अग्रिम शुभकामना।