माइती नेपालको भवन बनाएको समयदेखि मैले सूर्यबहादुर केसीलाई चिनेको हो। मैले बुझेसम्म सूर्यबहादुर केसी मजस्तै स्वभावको हुनुहुन्थ्यो, हकी र दयालु। उहाँ निकै हकी र दयालु स्वभावको मैले पाएँ। उहाँमा समाजका लागि केही गर्नुपर्छ भन्ने सोच थियो, समाजका लागि धेरै गर्नु पनि भयो। 

मलाई लाग्छ उमेरमा उहाँ र म सँगै होला। देशभरका मान्छेले मलाई दिज्यु भनेकाले उहाँले पनि मलाई दिज्यु नै भन्नुहुन्थ्यो।

मैले उहाँलाई सुरुमा ‘निर्माण व्यवसायी’ भनेर नै चिनेको हो। निर्माणकर्ता भएर नै चिनेको हो। माइती नेपालको भवन बनाउन झण्डै दुईवर्ष लाग्यो। त्यो दुई वर्षको दौरानमा मैले उहाँलाई बडो हकी, निर्माणको गुणस्तरमा ‘कम्परमाइज’ नगर्ने व्यक्तिको रुपमा चिने। उहाँले पैसा लिएर बनाइदिनु भए पनि इमानदारिताका साथ यति राम्रो भवन बनाइदिनुभएको छ कि यो भवन बनेको करिब २० वर्ष भयो, अहिलेसम्म एउटा केही पनि बिग्रिएको छैन। माइती नेपालको भवन सन् २००२ मा बनाएका हौं।