काठमाडौंको सामुदायिक स्कुल जहाँ निजी छाडेर आउँछन् विद्यार्थी

सेतोपाटी

सविना कार्की

• • •

कक्षाकोठा केही सानाजस्ता देखिए पनि उज्याला छन्। एउटा कक्षामा ३० जनासम्म विद्यार्थी अटाउँछन्। कोठाका भित्तामा पाठ्यवस्तुसँग सम्बन्धित सामग्रीहरू सजाइएका छन्। एउटा कोठामा सानो पुस्तकालय पनि छ।

केही कक्षाकोठामा इन्टरनेटको प्रयोगले डिजिटल माध्यमबाटै पठनपाठन हुन्छ। सबै कक्षाकोठा विद्यार्थीका लागि सहज छन्।

विद्यार्थीका लागि कम्प्युटर ल्याब पनि छ। लायन्स क्लबको सहयोगमा विद्यालयले २०७३ सालमा कम्प्युटर ल्याब स्थापना गरेको हो। शिक्षा मन्त्रालयबाट ६ लाख ५० हजार रूपैयाँ प्राप्त भयो। त्यही रकमले विद्यालयले १६ वटा ल्यापटप किन्यो, एउटा पुस्तकालय पनि बनायो।

यो बयान काठमाडौंको नागपोखरीबाट पूर्वतर्फ रहेको नन्दी माध्यमिक विद्यालयको हो। काठमाडौं महानगरपालिका वडा नम्बर १ मा रहेको यो विद्यालय महानगरको 'नमूना विद्यालय' हो।

• • •