भारतीय जनता पार्टी (भाजपा)का अध्यक्ष जेपी नड्डाको निमन्त्रणामा नेकपा (माओवादी केन्द्र)मा अध्यक्ष पुष्पकमल दाहाल प्रचण्ड आज भारत भ्रमणमा जाँदैछन्। दिउँसाे १ बजे प्रचण्डसहितकाे एउटा टाेली भारत प्रस्थान गर्ने कार्यक्रम रहेको प्रचण्डका स्वकीय सचिव रमेश मल्लले बताएका छन्।

प्रचण्ड भाजपा अध्यक्ष जेपी नड्डासँग भाजपा मुख्यालयमै भेटवार्ता हुने तय भएको छ। यस अवसरमा भाजपा विदेश विभाग प्रमुख विजय चौथाईवासहित केही अन्य शीर्षस्थ नेताहरूको उपस्थिति हुने बताइएको छ।

तीन दिने भारत भ्रमणको क्रममा अध्यक्ष प्रचण्ड र भारतका राष्ट्रीय सुरक्षा सल्लाहकार अजीत डोभालबीच भेटवार्ता तय भएको छ। यस्तै भारतका विदेश मन्त्री डा.एस जयशंकर र विदेश सचिव विनय मोहन क्वात्रासंग पनि प्रचण्डको भेट तय गरिएको छ।

भारतका प्रधानमन्त्री नरेन्द्र मोदीसँग को भेट अहिले निश्चित नभएको जानकारी दिइएको छ।

प्रधानमन्त्री शेरबहादुर देउवाकी पत्नी आरजु राणा दिल्ली भ्रमणमै रहेका बेला प्रचण्ड पनि भारत जान लागेका हुन्।

प्रचण्ड असार १ गते स्वदेश फर्कनेछन्।