अमेरिकामा मध्यावधि निर्वाचनको मतगणना जारी छ । पछिल्लो परिणामअनुसार कंग्रेसको तल्लो सदन हाउस अफ रिप्रेजेन्टेटिब्समा सानो बहुमतको सम्भावना लिएर रिपब्लिकन पार्टी अगाडि बढिरहेको छ भने सिनेटमा त्यतिकै पातलो भए पनि आफ्नो बहुमत कायमै राख्ने डेमोक्रेटिक पार्टीको आशा पनि जीवितै छ । 

४३५ सदस्यीय कंग्रेसमा बहुमतका लागि २१८ स्थान चाहिन्छ । अहिलेसम्म रिपब्लिकनका लागि २०३ र डमोक्रेट्सका लागि १८७ स्थानमा जीत प्रक्षेपण गरिएको छ । यो जीतमा डेमोक्रे्सले ४ स्थान र रिपब्लिकनले ११ स्थान एक अर्को पार्टीबाट आफ्नो पक्षमा ल्याएका छन् । अझै तीब्र प्रतिस्पर्धा रहेका ४५ स्थान अनिर्णित छन् । तर, यी स्थानमा उम्मेद्वारहरूले कायम राखेको पछिल्लो अग्रता कायमै रहेका रिपब्लिकनले २२२ र डमोक्रेट्सले २१३ स्थान जित्ने देखिन्छ । यस अर्थमा रिपब्लिकन पार्टी ४ मतको झस्नो बहुमतका साथ क्यापिटल हिलमा फर्कने देखिन्छ ।

यसैगरी, कंग्रेसको माथिल्लो सदन सिनेटमा डेमोक्रेट्स ४८ र रिपब्लिकन ४९ स्थानमा विजयी हुने प्रक्षेपण गरिसकिएको छ । यो प्रक्षेपणमा बहुचर्चिच पेन्सेल्भेनिया राज्यको ओपन सिनेट सिट पनि रहेको छ । रिपब्लिकन प्याट टमीले अवकाश लिएर ओपन सिट भएको यो स्थानमा डेमोक्रेट्स जोज फ्याटरम्यान विजयी हुने प्रक्षेपण छ । डेमोक्रेटसलाई सिनेटमा बहुमत जोगाउने यो महत्वपूर्ण 'फ्लिप' हो । यस्तो' फ्लिप' को सुअवसर रिपब्लिकन पार्टीलाई मिलेको छैन । 

१०० सदस्यीय सिनेटमा ९७ स्थानको परिणाम प्रक्षेपण गरिसकिएको छ । अब, सबैको ध्यान जोर्जिया, नेभादा र एरिजोनाको तीन स्थानमा अडिएको छ । मतगणना जारी रहेका तीनै स्थानमा अहिले डेमोक्रेट्स सिनेटर छन् । यी तिनैजनामध्ये कुनै दुईले मात्र पनि आफ्नो स्थान जोगाए डेमोक्रेट्स अहिलेको जस्तै ५०को आधा स्थानमा पुग्नेछ र सिनेटको पदेन अध्यक्ष उपराष्ट्रपति हुने भएकाले डेमोक्रेट्सकै सिनेटमा प्राविधिक बहुमत हुने छ । तर, तीनमध्ये दुईमा पराजीत भए ५१ स्थानका साथ रिपब्लिकन बहुमतमा पुग्नेछन् ।

मतगणना जारी रहेका यी तीन स्थानमध्ये एरिजोना र जर्जियामा डेमोक्रेट्स र नेभादामा रिपब्लिकन उम्मेद्वार अगाडि रहेका छन् । एरिजोना र नेभादामा यही चरणमा परिणाम आउने भए पनि तीन उम्मेद्वार रहेको जर्जियामा कसैको पनि ५० प्रतिशत मत नकटे पहिलो मत ल्याउने दुईबीच डिसेम्बरमा दोस्रो चरणको मतदान हुन्छ । त्यसैको परिणामले अमेरिकी सिनेट कस्को पक्षमा जाने निर्णय गर्छ ।

अहिलेसम्मको आँकलनमा कम्तीमा पनि सिनेटमा डेमोक्रेट्सको अहिलेकै जस्तो प्राविधिक बहुमत हुने देखिन्छ भने हाउस अफ रिप्रेजेन्टेटिब्समा रिपब्लिकनको झिनो बहुमत हुने देखिन्छ । यसको अर्थ, अहिले हाउस अफ रिप्रेजेन्टेटिब्समा पातलो बहुमतमा रहेको डेमोक्रेट्सले आफ्नो बहुमत गुमाउनु हो । 

यस कोणबाट हेर्दा यसपटकको मध्यावधि निर्वाचनमा राष्ट्रपति जो बाइडनको विपक्षमा जनमत गएको देखिन्छ । तर, खासगरी दक्षिणपन्थी राजनीतिक पण्डितहरूले अमेरिकामा रातो लहर आएर बाइडनलाई लज्जास्पद हार दिन्छ भनेर गरेको प्रक्षेपणचाँहि पूरा भएन ।

वास्तवमै भन्ने हो भने यसपटक बढ्दो मुद्रास्फिति र महंगीका कारण अमेरिकी जनता बाइडन र उनको पार्टी डेमोक्रेट्ससँग रिसाएकै थिए तर  पनि उनीहरूले त्यसको तातो रिस मतपत्रमा भने यथेष्ठ मात्रामा देखाएनन् ।